Mannan vahkus searvvai Kjell Olav Guttorm guvttiin ealggain min ealgabivdogilvui, ja dat gánnáhii go son vuorbáduvvui ge vahku vuoitin.
Mannan vahkus searvvai Kjell Olav Guttorm guvttiin ealggain min ealgabivdogilvui, ja dat gánnáhii go son vuorbáduvvui ge vahku vuoitin.
Son vuorbáduvvui vuoitin áldduin man bážii Njoammeljogas mannan duorastaga, dat dettii birrasiid 200 kilo ja lei ge nubbi ealga maid Kjell Olav lea báhčán dán čavččas.
– Diet lei hui erenoamáš beaivi go leimme áhčiin bivddus, massiime beaivet ovtta sarvá ja manaime tealttá lusa fas. Ledjen doppe oanehaš muhto de šattai miella fas vuolgit bivdit, nu ahte mannen okto beatnagiin. Go de ledjen oanehaš jávkan de riŋge áhčči, muitala Kjell Olav.
Diimmu duohken
Telefongeažis gullá ahte su áhčči ja nubbi bivdoskibir oaidniba ealgga kiikaris, dies lahka tealttá.
– Mun de gehččen kárttas ja oainnán mun ádjánan diimmu dohko joavdat, ja mun de vulgen ealgga guvlui. Duot guovttos ges bagadeaba mu bivdoradio bokte, muitala Kjell Olav.
Son de joavddai ealgga lahka ja beasai báhčit dan.
– Dat lei gaskkal 150 ja 200 mehtera duohken go báhčen dan, muitala Kjell Olav.
(Ášši joatká gova vuolábealde)
Priváhtagovva
Vuosttaš geardde áibbas okto báhčán
Diet ii lean vuosttaš ealga maid Kjell Olav lea báhčán dán čavččas, go son lea árabus báhčán maiddái sarvá, mainna maid searvvai min gilvui.
– Dát guokte ealgga leat vuosttaš ealggat maid lean báhčán áibbas okto, muhto duorastaga fearán gal lei hui bures koordinerejuvvon, mus ledje veahkit radio duohken mat oidne ealgga ja veahkehedje mu, čilge son.
Ii leat máŋgga jahkái bivdán
Dábálaččat lea Kjell Olav studeanta, muhto dán jagi lea čállimin masterbarggu, danne leage astan searvat ealgabivdui.
– Mun lean leamaš mielde bivddus dan rájes go ledje 8-9 jahkásaš, muhto skuvlla geažil in leat beassan maŋimuš jagiid searvat. Dán jagi de heivii ja lea ge leamaš somás čakča, lohká son ja rámida maiddái beatnaga.
– Dat lea leamaš buorre beana mii ii ciela menddo sakka, ledne olu ealggaid gávdnan ja daid šaddan diktit mannat go eai leat leamaš kvohtas. Sotnabeaivvi gávnnaime maid golbma ealgga, muhto dalle ges ii heiven biegga go dat hakse munno ja nu ean beassan daid báhčit, čilge son.
Ovddit vahku vuoiti: – Váttis sániiguin čilget
Searvva don ge!
Ávvir sávvá lihkku Kjell Olavii, ja jus don háliidat searvat de gávnnat gilvvu dáppe.
Mii vuorbádat vahkkosaččat muhtima guhte vuoitá Ávvira t-báiddi, Ávvira ealgabivdi gaibagahpira ja mátketelefonveaskku man Finnmárkkuopmodat FeFo lea skeŋken gilvui.
Gilvu bistá golggotmánu 31. beaivái, dan maŋŋil vuorbádat váldovuoiti, vuoitun lea 5000 ruvdnosaš skeaŋkakoarta.
Losimus ealgga ovddas oažžu ges Ávvira ealgagonagas dahje -dronnet gaibagahpira.
