Bjørnar Kandola lea goalmmát vahkku vuoiti Ávvira ealgabivdogilvvus, ja ii loga goassige oaidnán nu somás čoarvvát ealgga go dat mainna son searvvai gilvui.
Bjørnar Kandola lea goalmmát vahkku vuoiti Ávvira ealgabivdogilvvus, ja ii loga goassige oaidnán nu somás čoarvvát ealgga go dat mainna son searvvai gilvui.
Mannan vahkkus serve guđas Ávvira ealgabivdogilvui, ja odne vuorbádeimmet vuoitti ja dán vuoru vuittii Bjørnar Kandola, gii orru Ánnejogas, Čáhcesullo suohkanis.
Go vuorbáduvvui vuoitin, de vuoitá Ávvira ealgabivdi gaibagahpira, Ávvira t-báiddi ja mátketelefonveaskku man Finnmárkkuopmodat FeFo lea skeŋken gilvui.
Šattai gálašit
Kandola lea bivdán Salčoskáiddi bivdoguovllus, ja bážii variha mii dettii 124 kilo.
– Mun oidnen giikariin dat bođii jeakki rastá ja guođui jávregátti guvlui, ja jurddašin mun vuorddán, soaitá boahtit nubbi ealga. Mun vurden oanehaččat, muhto ii boahtán nubbi, nu ahte báhčen dan, muitala son fearana birra go njeiddii ealgga.
Vuosttaš vahku vuoitti: Searvvai ja vuittii
Dego moskusvuoksá
Son muitala ealga gáhčai jávrái ja sii šadde gálašit čibberádjái gáddái oččodettiin ealgga.
– Varihis ledje guokte sárggi, ja danne lei hui ártet oaidnit. Mu mielas lei justte dego moskusvuoksá oaidnit daiguin čorvviiguin, reašká Kandola.
Njeallje jagi boddu
Kandola lea bivdán ealggaid 2002 rájes, muhto maŋemus njeallje jagi ii leat leamaš bivddus, ovdal go mannan vahkus go báži fas ealgga.
– Dat gal lei oba buorre dovdu go fas bessen báhčit ealgga, lohká son. Kandola lea ruovttus dál, muhto lea fargga fas vuolgime bivdui, go sis lea vel okta ealga earis
Ovddit vahku vuoiti: Boares njiŋŋelasain vuittii
Háliidat go vuoitit nie movt Bjørnar Kandola? Searvva gilvui
Gilvu
Gilvovahkku bistá vahkku, sotnabeaivvis diibmu 00.00 sotnabeaivái diibmu 23.59 rádjai, ja buohkat geat dan áigodagas leat searvan, leat mielde vahkkosaš vuorbádemiin vuossárggaid.
Gilvu bistá gitta golggotmánu 31. beaivái, nu ahte lea ain vejolaš searvat gilvui man gávnnat avvir.no neahttasiiddus.
Buohkat geat servet leat maiddái mielde váldovuoittu vuorbádeamis, váldovuoitu lea 5 000 ruvnno ovddas skeaŋkakoarta.
Dat guhte lea báhčán losimus ealgga, ges oažžu ealgagonagas dahje -dronnet gaibagahpira.
Ávvir sávvá lihkku vahkku vuoitái, ja giitit buohkaid geat leat searvan gilvui dássážii!
