Álggii bargat návehis 14-jahkásažžan:
Dán jagáš Finnmárkku eanodoalu fitnodatovddideamibálkkašumi vuoiti lea Fred Roald Johnsen Juovlavuonas Deanu gielddas.
Johnsen doaimmaha Alfheim návetdoalu Juovlavuonas.
– Lea hui somá oažžut dakkár dohkkeheami, ii dušše munnje persovnnalaččat, muhto buohkaide geat leat dáppe dán návetdoalus, dadjá Fred Johnsen.
Máŋggabealat návetdoallu
Alfheim návetdoallu lea máŋggabealat návetdoallu gos lea sihke mielkedoallu ja biergobuvttadeapmi. Návetdoallu lea maiddái dohkkehuvvon «Inn på tunet gård» dállun. Doppe lágiduvvojit iešguđetge doaimmat sihke geassit ja dálvet. Dasa lassin Johnsen doaimmaha muorrabuvttadeami ja muohtaboltuma.
Šibitdoalus leat vihtta bargi, 40 mielkegusa ja 100 gussaealli, ja lea 321 000 lihttera mielkeearri.
14-jahkásažžan bargagođii návetdoalus
Alfheim návetdoallu ásahuvvui 1954:s ja otná bálkkašumi vuoiti lea leamaš bálkkahuvvon barggus návetdoalus dan rájes go lei 14-jahkásaš. Fred Johnsen lea aktiivvalaš jietna servodatdigaštallamis sihke báikkálaš ja fylkkapolitihkkárin, ja lea maid ovdal leamašan Finnmárkku boanddaidsearvvi jođiheaddji.
– Fred Roald Johnsen ovddida eanadoalu hui buori vuogi mielde, ja dan lea son dahkan su iežas návetdoaluin ja su nana servodatberoštumiin. Son lea báikkálaš birrasii positiivvalaš doarjja, dadjá guovlludirektevra Linda Beate Randal, Innovašuvdna Norga Arktisa preassadieđáhusas.
