-Almmuhus-
KULTUVRA– Somá ja gelddolaš

– Somá ja gelddolaš

-

-

Anna Näkkäläjärvi-Länsman illuda ruovttu lávddis almmuhit ođđa skearru ja lohká musihkka leamašan ja lea oassi su eallimis.

Anáraš Anna Näkkäläjärvi-Länsmana (36) ásahii jagi 2009 Ánnámáret Ensemble joavkku, go Näkkäläjärvi-Länsmana háliidii ovddidit iežas musihka. 2011:s ilmmai joavkku vuosttaš skearru, ja dál lea joavkkus boađi boađi nubbi skearru, «Gollehelmmot», man almmuhit eamiálbmogiid musihkkafestivála Ijahis ijas Anáris dán vahkkoloahpa.

 – Ijahis idja lea mu ruovttolávdi, ja nu lea somá ja gelddolaš almmuhit min nuppi skearru festivála oktavuođas, lohká musihkkár Anna Näkkäläjärvi-Länsman. Joavku almmuhii vuosttas skearru, «Beallječiŋat», 2011 giđa.

 

Ovttastahttit musihka

Anna Näkkäläjärvi-Länsman muitala sus leamašan guhkit áigge niehku ovttastahttit Davviriikkaid álgoálbmotmusihka sámi musihkain ja Ánnámáret Ensemble joavkkuin lohká ožžon dan vejolašvuođa.

 – Joavkkus leat čeahpes čuojaheaddjit, singuin mu musihkka dego girdila áibmui, lohká Näkkäläjärvi-Länsman.

 

Musihkka oassi eallimis

Anna Näkkäläjärvi-Länsmana lea bajásšaddán Anáris ja son muitala mánnán jo čájehan beroštumi musihkkii. Son 15-jahkásažžan fárrii Roavvenjárgii gos studerii musihka ja klarineahta. Son gávnnai guoimmi geainna náitalii ja fárrii Ohcejohnjálbmái gos dál ain orru bearrašiin. Soai isidiin leaba guokte máná ožžon ja Anna muitala musihkka lea oassi sin eallimis vaikko isit ii leat musihkkár.

 – Orun muitimin jahki lei 1990 go vuosttaš háve ledjen stuorát lávddis ja lávlon sámegillii. Dalle mis lei nieidajoavkku. Das rájes vulggii mu beroštupmi musihkkii. Mu golmmajahkásaš nieida liiko lávlut, go musihkka lea lunddolaš oassi min eallimis, muitala artista ja musihkkár.


MÁNNÁVUOĐAS BEROŠTIŠGOAHTÁN MUSIHKAS:
Anna ­Näkkäläjärvi-­Länsmana artista­namma lea Ánnámáret Ensemble, ja musihkka leamašan oassi
su eallimis mánnávuođa rájes. Govas lea su nieida sálas, Näkkäläjärvi-Länsmana lea ­bajásšaddan boazo­doallobearrašis. Priváhta govva

Ieš komponeren

«Gollehelmmot» skearrus leat logi ođđa bihtá, maid Anna Näkkäläjärvi-Länsman lea komponeren ja lea maid čállán skearru davvisámegiel teavsttaid.

 – «Gollehelmmot» skearru lávlagat muitalit sámi eallimis ja das movt sámi kultuvra lea bisson ealli kultuvran, vaikko máilbmi doppe olggobealde lea ollu rievdan ja ovdánan ja váikkuhan maiddái min. Teavsttain sáhttá maiddái áicat fuola sámiid boahtteáiggis, muhto maiddái ilu agálaš eallinvuogis ja min álbmoga albma oktavuođas lundui, čilge Näkkäläjärvi-Länsman. Ánnámáret Ensemble lávlagat váldet guldaleddjiid mielde dan beaivvi sápmelaš eallimii.

 

Ollašuhttit iežas niegu

Anna Näkkäläjärvi-Länsman muitala iežas nuorravuođa rájes guldalan álbmotmusihka ja liikon álbmotmusihkkii ja lea ge lunddolaš ahte juste dat musihkkastiila lea vuođđun su iežas musihkkii.

 – Lean álo háliidan ovttastahttit sámi elemeanttaid álbmotmusihkkii. Ovttas Ánnámáret Ensemblein lean beassan ollašuhttit iežan niegu, muitala son.


LÁVDDIS NIEIDDAIN: Anna Näkkäläjärvi-Länsmana lávlume Gáregasnjárgga kapeallas
miessemánus 2016 ja lávddis maiddái su nieida Anni-Siviä Länsman. Priváhta govva

Rámida musihkkáriid

Ánnámáret Ensemble -joavkkus čuojahit Johanna Juhola, Janne Lappalainen, Sami Kurppa, Ilkka Heinonen ja Anna Näkkäläjärvi-Länsmana lea vokalista.

 – Mus lea sullii seamma joavku čuojaheame dás go vuosttas skearrus. Lean giitevaš go háliidit čuojahit mu musihka. Sii leat čeahpes musihkkárat geat máhttet čuojahit ja mu musihkka áimmu mielde girdila go joavku dan čuojaha, muitala Näkkäläjärvi-Länsman, gii lávke Ijahis ija lávdái lávvardaga gos almmuha joavkku nuppi skearru.

-Almmuhus-