-Somá guoskkahit sámekultuvrii

Duorastaga finadii dovddus artista Timbuktu Guovdageainnus, ja doalai konseartta mánáide ja nuoraide.  Konsearta lei buot skuvlamánáide vuosttaš luohká rájes gitta joatkkaskuvlaohppiide.

Ieš artista lohká Ávvirii maŋŋel konseartta ahte lei somá boahtit deike ja earenoamážit skuvlamánáide čuojahit. Timbuktu sávvá ahte su musihkka sáhttá šaddat inspirašuvdnan ja nuorat bargagohtet musihkain.

Timbuktu dajai maid ahte sutnje lei buorre vásáhussan dát ahte Guovdageainnus, Kárášjogas ja eará báikkiin oahpahus lea sámegillii, ja ahte lei somá vásihit veahá sámekultuvrra.

Timbuktu  čuojahii juo Várggáin (18.04), Čáhcesullos (19.04), Deanus (20.04), Girkonjárggas (21.04), Báhcavuonas (22.04), Bearalvágis (25.04), Davvesiiddas (26.04), Kárášjogas (27.04) ja Leavnnjas (27.04).