Guovdageainnu nuorra ráppar Josef Per Buljo lea rámis go beassá ligget lávddi ovdal beakkán Isac Elliot lávke lávddi ala.
Sámi Musihkkafestivála leat hui rámis almmuhit nuorra sámi artisttaid geat galget seamma lávddi ala go beakkán Isac Elliot nuoraidkonsearttas Guovdageainnus cuoŋománu 1. beaivvi.
– Mii hálidit loktet min nuorra sámi artisttaid ja danin bovdet sin seamma lávddi ala gos Isac Elliot galgá čuojahit. Mii leat válljen golbma nuorra artistta geat eai leat vel oalát beakkehan sámi musihkkamáilmmis, muhto geaid eatnasat goitge dovdet. Sii leat Inger Karoline Gaup, Maiken Kemi ja Josef Per Buljo, lohká Sámi Musihkkafestivála buvttadeaddji, Nils Johan Vars.
– Hui somá
Nuorra Guovdageainnu bárdni, Josef Per Buljo (20) gii diibmá šattai nubbin Sámi Grand Prix lávlunoasis lohká sihke somán ja gelddolažžan beassat ráppet seamma lávddi alde go Isac Elliot:
– Vaikko mun ieš in gal láve čuojahit Isac Elliot musihkaid, de lea son dovddus miehtá Eurohpá ja lea dieđusge stuora vejolašvuohta beassat seamma lávddi ala go son. Dohko bohtet olu olbmot ja de olahan mun maid oallugiid iežan musihkain, lohká Josef Per.
Josef Per Buljo (20) lei diibmá mielde Sámi Grand Prix lávlunoasis ráppain «Eallin manná viidáseappot» masa son lei ieš čállán sániid ja šuoŋa. Son šattai nubbin. Dán rájes ii leat beaggán nu olu, muhto son lea bargamin cd-almmuheami guvlui ja árvideamis beassat konsearttas gullat muhtun ođđa ráppa sus.
Son lohká iežas illudit fas lávket lávddi ala, go ii leat báljo gullon dán rájes go diibmá searvvai Sámi Grand Prix lávlunoassái.
– Mun galggan guokte ráppa váldit doppe. Nubbi šaddá dat mainna diibmá serven Sámi Grand Prixi ja nubbi fas áibbas ođđa ráppa.
– Ii kommentára!
Árvalussii ahte jáhkká go nieiddaid dáfus oažžut stuora beroštumi go galgá seamma lávddi ala go Isac Elliot, go leat hui olu nuorra nieiddat geat liikojit Isac Elliotii ja bohtet su konsearttaide, de vástida Josef Per jođánit:
– Diesa mus ii leat gal kommentára, ja bohkosa suollemasat.
– Stuora vejolašvuohta munnje
Nubbi artista gii galgá lávdde ala seamma eahkeda go Isac Elliot lea Inger Karoline Gaup.
– In dárbbašan guhkes áiggi árvvoštallat áiggun go searvat, go Sámi Musihkkafestivála válddii oktavuođa muinna. Ledjen oalle jođán vástidit ahte dása gal áiggun searvat, go ledjen veaháš jurdilan lea go dá juoga mas mun áiggun leat mielde. Lea stuora gudni beassat seamma lávddi ala go Isac Elliot, lohká nuorra artista Inger Karoline Gaup. Son láve ieš čuojahit Isac Elliot musihkaid ja liiko bures su musihkkii.
– Sávvamis liikojit mu musihkkii maid
– Oainnán dán stuora vejolašvuohtan alccen artistan beassat leat mielde dás. Dohko bohtet olu olbmot ja mun lean aitto almmuhan CD, ja illudan beassat lávlut konsearttas gosa vurdet ná olu olbmuid. Sávan dieđusge ahte liikojit mu musihkkii maid, eaige dušše Isac Elliot, lohká Inger Karoline.
Inger Karoline Gaup (20) lea aittobáliid almmuhan su vuosttaš CD «Sweet Love» Son lea maid vuoitán Sámi Grand Prix lávlunoasi ja lea olu lávddiid alde lávlon, sihke ruovttubáikkis ja eará báikkiin. Son vuittii maid 2010s Riddu Riđđu taleantagilvvu «Riddu Násttit».
Goalmmát artista gii galgá ligget lávddi lea Maiken Kemi. Son lea maid nuorra báikkálaš artistta gii lea almmuhan cd ja dovddus nuoraid gaskkas. Son almmuhii 2014s CD «Olmmái» Ávvir ii ožžon su ságaide odne eahket.
Nuoraidkonsearta álgá diibmu 18.00 ja dat golmmas galget ligget lávddi ja gehččiid ovdal go Isac Elliot lávke lávddi ala.
