-Almmuhus-
KULTUVRASolidaritehta lihkadusa historjá čájáhussan

Solidaritehta lihkadusa historjá čájáhussan

-

-

Álbmotakšuvdna Álttá-Guovdageainnu čázádaga dulvadeami vuostá (su. 1978–1982) dagahii stuorra rievdadusaid davvihistorjjás. Dál rahppo čájáhus mas aksuvnnaid áiggi ja dálááiggi dáidda čájehuvvo.

Akšuvdna viiddui vuorddekeahttá siviilaservodatsolidaritehta lihkadussan sihke Sámis, Norggas ja riikkaidgaskasaččat – mas maiddái sámedáiddárat ledje guovddážis.

 

Čalmmustahttet akšuvnna

Sámi Dáiddaguovddáš (SDG) almmuha «Ellos eatnu. Iehčanas dáhttu ja ođđa máilmmálašvuođa duddjon» čájáhusa gaskavahku, miessemánu 15. beaivvi.

– Go dál čájehit čájáhusa, de háliida SDG čalmmustahttit Álttá-Guovdageainnu akšuvnna dáhpáhusaid, muhto maiddái čujuhit proseassaide mat dál leat jođus. Čájáhusas leat dáiddáriid barggut geat leat doaibman jo 70-logu rájes, ja maiddái dálá ođđa dáiddárbuolva, Dáiddadálus Guovdageainnus. Mii oaivvildit ahte lea čájáhus masa lea beroštupmi boahtit geahččat, lohká SDG direktevra Kristoffer Dolmen.


Dáiddadálu Artist Collective filmmas govva: «Don‘t fuck with me/ Ále dájo muinna», 2018.

 

Manifestašuvdnan

Čájáhusas oaidná sámedáiddáriid váikkuheaddji rolla akšuvnnas, ja dan solidaritehta maid sin dáiddárustibat olggobealde sámi čájehedje sidjiide.

Boarrásat ja ođđasat dáiddabargguide lassin, čájehuvvojit oasážat vuorkkás Álbmotakšuvnna Álttá-Guovdageainnu-čázádaga dulvadeami vuostá.

– Dá lea čájáhus man leat illudan oažžut min lusa, ja lea manifestašuvdnan dan dehálaš rollii sámi servvodagas mii dáiddáriin ja kulturbargiiguin lea leamaš ja ain lea, joatká Kristoffer Dolmen dan oktavuođas go čájáhus dál rahppo Kárášjogas.

 

Máŋgalogi dáiddára

Dáiddárat čájáhusas leat Jovn’Ovllá/Jon Ole Andersen, Áillohaš/Nils-Aslak Valkeapää, Maria Thereza Alves, Jimmie Durham, Elle Márjá Eira, Mai-Lis Eira, Aage Gaup, Trygve Lund Guttormsen, Josef Halse, Geir Tore Holm ja Søssa Jørgensen, Rose-Marie Huuva, Berit Marit Hætta, Susanne Hætta, Ánddir Ivvár Ivvár/Iver Jåks, Keviselie/Hans Ragnar Mathisen, Britta Marakatt-Labba, Joar Nango ja Tanya Busse, Rannveig Persen, Synnøve Persen, Máret Ánne Sara, Arvid Sveen, Catarina Utsi, Elin Már Øyen Vister ja earát.

 

Čájáhusbuvttadeapmi

Čájáhushápmi «Ellos eatnu. Sorjjasmeahttunvuođa ja ođđa máilmmálašvuođa dáhttu» čájáhusas, mii dál čájehuvvo, lea Raisa Porsanger kurateren ovttas SDG prošeaktajođiheaddji Kristoffer Dolmeniin.

Čájáhusbuvttadeaddji lea Office for Contemporary Art Norway (OCA).

Čájáhusa álgohámi, mii Oslos čájehuvvui, leigga Katya Garcia-Antón ja Antonio Cataldo kurateren, ja ráđđeaddilávdegottis leigga vuosttasamanueansa Harald Gaski ja sámi duoji professor Gunvor Guttorm.

A-lab/Káre R. Anti ja Torsteinsen Design bokte lea čájáhusa hábmen.

Čájáhus lea miessemánu 15. beaivvis gitta suoidnemánu 7. beaivái Sámi Dáiddaguovddáža báikkis Kárášjogas.

-Almmuhus-