Guokte beaivvi ovdal go Norga dagai historjjálaš mearrádusa giddet Norgga njukčamánu 12. beaivvi, de ipmirdii ráđđehus makkár duođalaš dilis Norga lea, lohká Norgga stáhtaministtar Erna Solberg.
Dan ovdal lei stáhtaministtar ja olles ráđđehus dan jáhkus ahte dávda njoammu unnit ja njoazibut ja ahte nagodit gieđahallat dávdda geahppaseappot, lohká Solberg VG-jearahallamis.
– Mii ipmirdeimmet juo ođđajagemánu loahpas dan duođalašvuođa ja suovaimet Dearvvašvuođadirektoráhta bargagoahtit njoammunsuodjalusdoaimmaid oažžut sadjái, muhto mii doaivvuimet ahte mis lei buoret áigi go dat mii lei, dadjá Solberg.
– Muhto njukčamánu 6., 7. ja 8. beaivvi, de oinniimet ahte dát dál leavvagoahtá jođánit. Dalle bohte buot dat stuora logut main oidnui gallis ledje leamaš Nuortariikkas ja buohccán.
Easka de ožžo diehtit olbmuid birra geat buohccájedje nu ahte eai nagodan šat guorrat gos dávda lei boahtán.
– Juste dalle fuomášeimmet ahte fertet bidjat johtui stuora ekonomalaš doaimmaid, go mii jurddašeimmet ahte dás šaddá stuorát bargguhisvuohta, muitala Solberg dan vahkkoloahpa birra guokte vahkku dás ovdal.
– Maŋŋelaš, gaskal njukčamánu 10. ja 12. beaivvi, de almmuheimmet daid čavges gáibádusaid ahte ferte giddet eanet ja eanet, ja unnidit olbmuid ovttastallama Norggas. Sivvan lei go lei leavvagoahtán nu ahte eat diehtán šat sihkkarit movt ja gos olbmuide lea koronadávda njommon, lohká Solberg.
Son lohká ahte mearrádus daidda garra heahtedoaimmaide dahkkui juste ovdalaš preassakonferánssa njukčamánu 12. beaivvi maŋŋel go Dearvvašvuođadirektoráhtta ja Álbmotdearvvašvuođainstituhtta ávžžuhedje dahkat nu.
(©NTB)
