Ikte lei čoahkkin Sámedikkis gos Deanu gielda ja Sámediggi ságastalle Sirpmá skuvlla boahtteáiggi birra.
Ikte lei čoahkkin Sámedikkis gos Deanu gielda ja Sámediggi ságastalle Sirpmá skuvlla boahtteáiggi birra.
Gielddastivra Deanus mearridii heaittihit Sirpmá skuvlla vuollegis ohppiidlogu dihte. Ikte lei čoahkkin sátnejođiheaddjis Sámedikkiin, ja sii áigot geahččalit gádjut skuvlla, čállá NRK Sápmi.
– Mun ferten gohččut ovdagotti čoahkkimii boahtte vahkku dán ášši gieđahallat. Lean oalle sihkar ahte Sirpmá skuvlla sáhttit fas rahpat čakčii mánáide vuosttaš luohkás viđat luohkkái, muitala Deanu sátnejođiheaddji Frank Martin Ingilæ.
Váhnemat movttáskan
– Eanaš váhnemat ledje čoahkkanan odne dan botta go lei čoahkkin, ja leimmet ráhkkanan vearrámus bohtosiidda eat ge duosttan árvádallat loahppabohtosa áššis, muitalii Nancy Porsanger ikte NRKii.
– Go álggos gulaimet ođđasa, orui jáhkkemeahttun ahte áššit njulget. Mii leat bargan ja rahčan dáinna áššiin, muitala Porsanger.
Gergosat doarjut skuvlla
Čoahkkimis lei sátnejođiheaddji Frank Martin Ingilæ, sámediggeráđđi Silje Karine Muotka ja sámediggepresideanta Aili Keskitalo.
– Mii leat gergosat doarjut ekonomalaččat nu guhká go min sávaldagaid čuvvot, earret eará lasihit sámi sisdoalu boahtte jagi, muitalii sámediggeráđđi Silje Karine Muotka.
