Beaskáđasčuoigamiid lágideaddji doaivu ruovdecugŋo addit buori čuoigansiivvu.
Beaskáđasčuoigamiid lágideaddji doaivu ruovdecugŋo addit buori čuoigansiivvu.
– Lea issoras buorre siivu, lea leamaš ruovdecuoŋu iige leat beaivet nagodan ligget. Veaháš unnán lea muohta báikkohagaid, dadjá Tore Fredrik Turi guhte lea okta Beaskáđasčuoigamiid lágideddjiin.
Jáhkká ođđa olahusaid boahtit
Ruovdecugŋo son jáhkká leat buorren čuigiide.
– Dál gal soitet gilvaleaddjit nagodit vel ođđa olahusaid, lohká son ja muitala maiddái daid geat eai leat gilvalit áigumin, beassat vásihit buriid siivvuid buorrevuođaid.
Loga maid: Beaskáđđasa badjel 41. ja 47. gearddi
Šadde maŋidit
Dán jagi lágiduvvojit Beaskáđasčuoigamat 50. geardde, muhto visot ii leat mannan plána mielde. Mannan vahkkoloahpa šadde maŋidit čuoigamiid garra biekkaid geažil.
– Dál gal beassat lágidit gilvvuid. Šattai dieđusge veahá lassi bargu go šattaimet maŋidit gilvvuid, muhto ii hal dálkái veaje okta ge maidege, dadjá lágideaddji.
Ain vejolaš dieđihit
Turi muitala gilvvuide dieđihan birrasiid 40-50 olbmo, ja jus it leat vel dieđihan gilvvuide dahje čuoigamiidda de lea ain vejolaš dan dahkat.
– Jua dieđusge, olbmot sáhttet eambbo boahtit Suolovuopmái ihttin gaskkal diibmu 8 ja 12 ja dies dieđihit, čilge son ja sávvá olusiid boahtit ihttin.
