Ruoŧa militearat ledje hárjehallame Giebmegáissis go muohtarihtu fierralii disdaga. Okta soalddát šattai riđui.
Vuosttaš diehtu bođii 11:30 disdaga. Ruoŧa politiijat sáddejedje gádjunveaga lihkohisvuođabáikái. Okta soalddát lei šaddan riđui. Ii oktage eará šaddan riđui. Son gávdnui riđus ja oaččui divššu lihkohisvuođabáikkis.
Norgga ambulánsahelikopter sáddejuvvui lihkohisvuođabáikái ja roasmmohuvvan soalddát sáddejuvvui Romssa universitehtabuohccevissui, muhto eai nagodan gádjut su heakka.
Lihkohisvuohta geavai plánejuvvon militearahárjehusas. Therese Fagerstedt, Ruoŧa Suodjalusa preassahoavda, duođašta SVT Norrbottenii ahte soalddát lea duššan lihkohisvuođas.
– Militearat leat hárjánan hárjehallat dan birrasis, muhto odne geavai juoidá mii ii oaččo geavvat. Mii leat guorahallame ášši. Mii addit dál doarjaga oapmahaččaide, bargoolbmáide ja olles militearajovkui, čilge son.
