Dáiddar Elle Sara Oskal lea guhká hálidan čájehit iežas dáidagiid. Dál lea viimmat rahpan iežas vuosttaš almmolaš govvačájáhusa Dáiddadálus, Guovdageainnus.
Dán jagi lea goalmmát jahki go Dáiddadállu bovde guossedáiddára doallat čájáhusa Dáiddadálus.
Dán jagi sii leat válljen dáiddara gii guhká lea hálidan Dáiddadállui, ja gii ieš jearai lea go vejolaš doallat govvačájáhusa.
– Elle Sara Oskal lea čeahpes dáiddár gii lea čájehan stuora beroštumi. Son lea hui áŋgiris ja hutkás dáiddár, ja mii leat hui ilus go son lea háliidan doallat dáppe govvačájáhusa, lohká Dáiddadálu dáiddár, Máret Ánne Sara.
Olu bargu
Beannot jagi lea Elle Sara bargan ja ráhkkanan čájáhussii man dál viimmat lea rahpan.
Muhtun govain lea eambbo bargu leamaš go earáin, muhto son lea hui duhtavaš.
– Lean guhká ráhkkanan ja illudan dán čájáhusa rahpat, ja lea hui stuora gudni. Lea hui somá ja hui buorre dovdu go vuohččan beasan čájehit iežan govaid almmolaš govvačájáhusas.
– Olu govaid lean easka dán jagi málen, go eanas inspirašuvnna han oažžu oanehis áiggis, boagusta son.
Erenoamáš čanastagat
Elle Sara lea 24-jahkásaš, ja lea Guovdageainnus eret.
Son gazzá dál oahpu ja orru Romssas. Boazodoallu ja luondu addá sutnje inspirašuvnna. Son lea bajásšaddan boazodoalus, ja lea unnivuođa rájes leamaš dákkár bargguin.
Dát lea dagahan ahte sus lea erenoamáš čanastat bohccui, man son čájeha iežas govaiguin.
– Boazu lea dat čábbámus maid dieđán, ja danne válljen dan dávjá motiivan iežan govaide. Favorihtta iežan govain lea govva mas áldu iežas ruksesmisiin. Lean ieš oaidnán dan, ja lei nu earenoamáš vásáhus, ja nu maid dat fiidnamus govva mu govain, dadjá son.
Soaitá vuosttaš oasti
Elle Sara govvačájáhusa rahpamii ledje olu guossit boahtán.
Okta sis lei sámediggepresideanta, Vibeke Larsen. Larsen lei hui ilus bovdejumi ovddas, ja lei ge vuosttaš geardi go finai Dáiddadálus.
Su mielas ledje olu fiinna govat, ja liikostii nu ládje govaide ahte soaitá juo mearridan oastit gova.
– Dáppe ledje olu fiinna govat, ja soaittán juo dál mearridan ahte áiggun oastit gova Elle Saras, lohká Larsen.
Rabas olles beassášvahkku
Elle Sara govvačájáhus lea rabas olles beassášvahkku, ja buohkat leat bures boahtimat Dáiddadállui geahččat govaid.
