-Almmuhus-
OĐĐASATSoaitá busse čuvvon Kárášjohkii

Soaitá busse čuvvon Kárášjohkii

-

-

Politiijat háliidit cavgilemiid dievddu birra gii lea dieđihuvvon lahppon. Politiijaid dieđuid mielde lea son čuvvon busse Kárášjohkii.

– Láhppon dievddu namma lea Jon-Arne Johansen ja lea maŋemus oidnon Rema 1000 rámbuvrra olggobealde Álttás bearjadaga diibmu 16 áiggi mannan vahkku. Johansen lea Tomasjordas eret Romssas, ja lei oaggunmátkkis Álttás iežas vieljain, dieđihit politiijat preassadieđáhusas.


Jon-Arne Johansen lea leamaš jávkosis bearjadaga maŋŋelgaskabeaivvi rájes. Dál almmuhit politiijat sihke su nama ja gova, ja sihtet olbmuid cavgilit jus leat dieđut su birra. Govva: Politiijat.

 

Soaitá mannan Kárášjohkii

Politiijat leat ožžon dieđuid ahte Johansen sáhttá váldán busse Álttás diibmu 16 bearjadaga, ja mannan gitta Kárášjohkii.

Muđuid eai leat eanet dieđut gosa Johansen sáhttá mannan.

 

Sáhttá guhkás vánddardan

Láhppon olmmái lea ovdal maid jávkan máŋga beaivvi. Son sáhttá vánddardit guhkes mátkkiid, ja sáhttá hilgut eará olbmuiguin hupmamis.

– Son lea 66 jagi boaris, 170 cm allat, guhkki ja seaggi. Sus leat oanehis, čurges vuovttat, ruškes čalmmit ja hupmá Romssa suopmana. Go láhppui, de sus lei čáhppes softshell-jáhkka mas lea oránša skoađas, asehis sevdnjes meahccebuvssat main lea rohttenlohkka čoarbbeliin, ja ránes goretex meahcceskuovat, čilgejit politiijat.

– Jus okta ge lea oaidnán su dahje leat dieđut su birra gos son sáhttá leat dahje lea leamašan, de sáhtát dieđihit politiijaide dán nummáriin, 02 800 dahje 78 97 20 00, dieđiha Finnmárkku politiijaguovlu preassadieđáhusas.

 

-Almmuhus-