Guolástusministtar, Guolástan ja mearrabivdoealáhusas riikkasearvi (FHL) ja Norgga mearrabiebmofitnodagaid riikkasearvi (NSL) vuolláičálle ikte šiehtadusa mii galggašii eastadit biebmoguliid gárgideames.
– Mihttu lea buoridit ovttasbarggu ealáhusa ja eiseválddiid gaskka vai eastadivččiimet ahte biebmoguolit besset olggos, ja movt meannudit go leat gárgidan biepmahagain, dadjá guolástusministtar Elisabeth Aspaker.
Ieža máksit
Guolástusministtar geatnegahttii gieskat ealáhusa máksit bivddu ovddas go biebmoguolit leat beassan merrii. Dál áigot ásahit joavku mas leat olbmot sihke ealáhusas ja eiseválddiid bealis, mat galget plánet ja máksit goluid vai unnoše gárgidan biebmoguolit luonddus.
– Nuoskkideaddji máksá- prinsihppa lea Norgga mearraealáhusas. Dalle go dien prinsihpa ii sáhte ollašuhttit, leat bealit soahpan ahte mearraealáhus searválaga galgá máksit goluid ja jávkadit biebmoguliid doppe gos lea dárbbašlaš, dadjá Aspaker.
Duhtavaččat
Ealáhusas lohket duhtavažžan dáinna bargguin. Guolástan ja mearrabivdoealáhusas riikkasearvi (FLH) direktevra Geir Ove Ystmark lohká buorren go eiseválddit váldet vuhtii ealáhusa sávaldagaid ja jotket “Miljøløftet”bargguin mainna álge 2011:s.
– Guollebiepmahagain eai galgga beassat guolit, ja jus nu geavvá, galget dat jávkaduvvot jogain, dadjá Ystmark.
