Sámediggi lea gárven ja šiehttan boahtte jagi dáiddársoahpamuša Sámi dáiddárráđi šiehtadalliiguin.
Golggotmánut 14. beaivvi lea Sámediggi gárven ja šiehttan dáiddársoahpamuša Sámi dáiddárráđi šiehtadalliiguin. Bealit leat soahpan ollislaš rámma mii lea 10 092 000 ruvnnu boahtte jahkái, mii lea 1 miljovnna lasáhus diimmá ektui.
– Lean ilus go Sámi Dáiddárráđđi (SDR) ja Sámediggi leat soahpan boahtte jagi dáiddáršiehtadusa. Sámi dáidda ja kultuvra leat áigeguovdilat ja mun lean ilus go mii sáhttit doarjut dan, ja addit eambbo doaibmadoarjaga SDR:i ja dáiddaorganisašuvnnaide vai sáhttet doaimmahit eambbo aktivitehtaid ja čalmmustahttit buot dan gelddolašvuođa mii geavvá dáiddasuorggi siskkobealde, lohká sámediggeráđđi Maja Kristine Jåma preassadieđáhusas.
Bealit leat soahpan ekonomalaš rámma, 5 379 000 ruvnno, mii galgá doaibmadoarjjan sámi dáiddaorganisašuvnnaide ja Sámi dáiddárráđđái. Bealit leat maid šiehttan ahte siskkobealde dan rámma lea 250 000 ruvnno doaibmadoarjja Ovttastussii Mun dajan – ovttastus sámi dáiddárat. Reasta ruhta geavahuvvo čállinguovddáža nannemii.
