-Almmuhus-
-Almmuhus-
OĐĐASAT– Snuksageavaheaddjit eai dieđe šat maid cogget baksama vuollái

– Snuksageavaheaddjit eai dieđe šat maid cogget baksama vuollái

-

-

Juovlamánu 9. beaivvi dohkkehii Stuorradiggi ođđa duhpátvahátlága. Dat mearkkaša ahte snuksadoasat šaddet neutrálan, almmá buktatdieđuid haga. Sisdoallu dattetge ii regulerejuvvo gal, nu Norgga snuksaborrit eai šat dieđe maid cogget baksamiid vuollán.

Swedish Match Norway gaskkusta snuvssaid, lighteriid ja riššaid Norgga márkanii.

Dát snuksafitnodat čuoččuha preassadieđáhusastis ahte snuksageavaheaddjit eai beroš snuksadoasaid ivnnis, logos ja hámis, muhto baicce das ahte doasas leat dieđut sisdoalu birra.

Ođđa lágain eai beasa geavaheaddjit šat diehtit makkár máistu snuvssas lea, man garas dat, gos lea buvttaduvvon dahje mii das sisdoallá.

– Árabus dán jagi čađahii Opinion riikkaidgaskasaš guorahallama mas Norgga snuksageavaheaddjit jerrojedje makkár dieđut sin mielas leat dehálepmosat snuksadoasas. 78 proseantta oaivvildedje ahte lea deháleamos diehtit man garas snuksa lea, 71 proseantta oaivvildedje ges leat dehálaš diehtit man guhká snuksa seailu ja 68 proseantta oaivvildedje ges dieđuid smáhka birra leat dehálažžan. Dál jávket buot diet dieđut, lohká Geir Hammer, Swedish Match Norway hálddahuslaš direktevra.

 

Ruoŧas earáládje

Norggas leat atnán doasa olggoža guovddážis, Ruoŧas ges nuppeládje. Ruoŧa buvttareguleren lea vuođđuduvvon WHO ávžžuhusaide ja leat garraseappot.

Geir Hammer muitala ahte Ruoŧa beale buvttareguleremis leat hui garra njuolggadusat dan ektui man olu snuvssain sáhttet leat sávakeahtes ávdnasat.

– Ii leat čiegusvuohta ahte snuvssas lea duhpát, ja ahte duhpáhis leat lunddolaš ávdnasat mat leat váralaččat jus dat olu leat. Ruoŧa reguleren lea hui garas. Danne lea Ruoŧa Livsmedelsverket cealkán ahte snuvssat, mat leat buvttaduvvon ođđa njuolggadusaid mielde, eai dagat lassi dearvvašvuođariskka jus ii geavat eambbo go ovtta bovssa poršuvdnasnuvssaid beaivái, čilge son preassadieđáhusas.

 

Eai leat vástidan

Juovlamánus 2015:s ávžžuhii NHO Mat og Drikke Norgga eiseválddiid árvvoštallat seamma garra buvttaregulerema snuvssaide Norggas, go Ruoŧas.

Norgga eiseválddit eai leat vuos mearridan maid áigot dahkat. 

Ovdal juovllaid meannudii Stuorradiggi ođđa lága snuksadoasaid ja duhpátpáhkaid standardiserema birra, nu galget buot snuksadoasat ja duhpátpáhkat oažžut neutrála páhkaid ođđajagemánu 1. beaivvi rájes 2018:s.

– Ođđa láhkaárvalusas anonyma bovssaid birra, sáhttá dagahit ahte Norggas vuvdojit buktagat mat leat lobiheamet Ruoŧas. Gávdnojit buktagat mat eai leat buvttaduvvon Ruoŧas, mat vuvdojit Norggas, lohká Hammer.

 

– Borgguheaddjit galget geahppánit

Norgga dearvvašvuođaministtar Bent Høie logai Nettavisenii diibmá, go láhkaárvalus almmuhuvvui, ahte lea dehálaš ahte dát guoská maiddái snuvssaide.

– Mis lea doarvái dutkan mii čájeha ahte snuksageavaheapmi lea hui eahpedearvvašlaš. Snuvssat eai leat šat borgguhanheaitinreaidun, muhto vuohki man bokte nuorat darvánit duhpáhii, logai Høie.

– Mii diehtit ahte borasdávdda ja eará dávddaid várra lassána snuksageavahemiin, vaikke dat ii leat nu váralaš go duhpátsuovva, lohká Borasdávdasearvvi Anne Lise Ryel, guhte oaivvilda eambbo dutkama addit eanet máhtu vahágiid birra boahtteáiggis.

Ryel jáhkká standardpáhkaid dagahit ahte eai nu sakka geasut borgguheapmái ja snuksageavaheapmái.

– Ulbmil lea ahte borgguheaddjit galggašedje njiedjat, go páhkat eai šat hábme image, logai son dalle.

-Almmuhus-