Dán jagi leat eanet váidon politiijaide lobihis luossabivddu geažil. Guhkimus fierbmeleaŋka maid SNO lea dán rádjái duoguštan lei sullii 210 mehtera guhku.
Geassemánu 9. beaivvi rájes gitta suoidnemánu 7. beaivvi rádjái dán jagi leat Stáda Luonddubearráigeahču (SNO) bálvvát duoguštan 63 lobihis fierbmeleaŋkka. Olles áigodagas go leat dárkkistan mearraluossabivddu, lea SNO duoguštan 115 fierbmeleaŋkka otná beaivve rádjái, dieđiha Birásdirektoráhtta Twittera bokte.
Dán rádjái lea SNO váidán 21 olbmo lobiheamet firpmiin bivdán. Jus buohtastahttá diimmážiin, de ledje seamma áigodagas váidán 12 olbmo.