SMAK borramušfestivála čalmmustahttá Davvi-Norgga biepmuid ja borramušvieruid. Borramušbuvttadeaddjit lohket festivála addit vejolašvuođaid ja lea dehálaš sin fitnodagaide.
SMAK borramušfestivála čalmmustahttá Davvi-Norgga biepmuid ja borramušvieruid. Borramušbuvttadeaddjit lohket festivála addit vejolašvuođaid ja lea dehálaš sin fitnodagaide.
Mannan vahkkus lágiduvvui SMAK borramušfestivála Romssa gávpogis.
Maŋŋá maŋŋálaga ledje badjel 50 borramuštealttá ceggejuvvon gávpotguovddáža Storgatai.
Borramušbuvttadeaddjit miehtá Davvi-Norgga fálle olbmuide guovllu herskuid.
Bohccobiergu bivnnut
Olles golbma bohccobiergobuvttadeaddji ledje boahtán Romsii čalmmustahttit ja vuovdit bohccobierggu.
Saltfjell rein guossoha suovastuvvon čoarbbeali man sáhttá borrat sihke láibebajožin dahje gaskabeaivin.
– Bohccobiergu šaddá eanet ja eanet bivnnut. Olbmot rámpojit ja liikojit bohccobierggu, dadjaba Lina ja Per Ole Oskal.
Dego giehtaduodji
Sáltoduoddaris leaba buktán sihke goikebiergguid ja varasbiergguid maid vuovdiba romsalaččaide.
Lina ráhkada borramuša ja Per Ole váldá vuostá olbmuid.
– Festiválas lea diehttelasat stuora mearkkašupmi fitnodahkii. Lea maid erenomáš go besse ráhkadit biepmu nu go háliidetne ja vuovdit dan. Biergu lea dego giehtaduodji. Lea olbmo duohken makkár mágu oaččot bierggus, lohká Per Ole Oskal.
– Eat leat šat nu čihkosis
Hjerttind Rein AS lea goalmmát gearddi SMAK festiválas. Per Thomas Oskal čájeha ja muitala ahte fállet olbmuide suovastuvvon bierggu mas lea saláhta ja jokŋabuonjus.
Nubbi borramuš man fállá lea suovastuvvon njuovčča man guossohit poláraláibbiin, saláhtain ja lávkkiin mii lea bidjon suvrraláhkái.
– Lea hui buorre go beassat sámi biepmuid maid čalmmustahttit dáppe. Eat leat šat nu čihkosis ja olbmot besset smáhket min biepmuid, muitala Oskal.
Gullan goikebiergobuvttadeaddji birra
Kautokeino Rein lea gieskat ožžon ođđaháhkanbálkkašumi.
Fitnodat lea geavahan olu áiggi hábmet fiinna páhka goikebiergguide maid vuvdet.
– Bálkkašupmi gal movttiidahtii ja orrot hui riekta bargan. Dál leat ráhkadahttán plakáhta mii muitala bálkkašumi birra, ja dat galggašii veahkkin vuovdalit bierggu. Oallugat geat fitnet dás lea gullan min birra medias, ja de gal lea mihá álkit vuovdit, čilge Per Anders Bongo.
Ođđa vejolašvuođat
Bálkkašupmi ja SMAK borramušfestivála addá ođđa vejolašvuođaid guovdageaidnulaš bohccobiergobuvttadeaddjái.
– Mii leat vuovdigoahtán goikebierggu rámbuvrriide, ja dáppe maid galgat čoahkkinastit rámbuvrraiguin. Dasa lassin lean gullan dáppe olu olbmuid, nu ahte vuordit ahte oallugat galledit min, dadjá Bongo.
70.000 guossi
SMAK borramušfestivála gallededje sullii 70.000 olbmo.
Festivála álggahuvvui 2013:s. Ulbmil lei geasuhit eanet nuoraid gazzat koahkaoahpa.
– Dan rájes lea borramušfestivála ovdánan. Biepmobuvttadeaddjit oainnat gávdne iežaset sajiid ja festivála geasuhii vaikke man olu olbmuid. Dán jagi árvvoštallat sullii 70.000 olbmo fitnan festiválas, ja dainna mii leat hui duhtavačča, lohká SMAK festivála prošeaktajođiheaddji Natalie Robertsen.
Liikogoahtán guovllu borramušaid
Njealji jagis lea SMAK borramušfestivála viiddiduvvon.
Earret eará lágiduvvojit borramušeahketfeastat, borramuškurssat ja smávimusaide lea ráhkaduvvon sierra prográmma.
Robertsen dadjá festivála leamaš dehálaš guovllu borramuššii.
– Davvi-Norgalaččat leat álo beroštan eará guovllu borramušvieruin, muhto mun jáhkkán SMAK leamaš mielde geasuheamen olbmuid borragoahtit maiddái guovllu borramušaid. Mii diehtit goit ahte boradanbáikkit vásihit ahte olbmot sihtet eanet Davvi-Norgga borramušaid, čilge Robertsen.
Bohccobierggus lunddolaš sadji
SMAK festivála čalmmustahttá olles Davvi-Norgga borramušaid, ja prošeaktajođiheaddji muitala ahte bohccobiergobuvttadeddjiid háliidedje álggu rájes mielde.
– Álggos lei oalle hástaleaddji sin oažžut mielde go festivála lea justa njuovadeami oktavuođas, muhto dál vásihat ahte badjeolbmot háliidit boahtit, lohká Robertsen.
Goikeguolli dearvvašlaš
SMAK festivála muitala ahte Finnmárkku dovdomearka lea bohccobiergu, Romssa čalmmustahttet guliin ja Nordlándda ges gáicačivgabiergguin.
Sommarøy:s olggobealde Romssa buvttaduvvo Havgull goikeguolli.
Fitnodat lea vuohččan SMAK festiválas, ja deike gal lohket nuppes maid vuolgimin.
– Midjiide lea hui dehálaš čájehit iežamet buktaga ja gullat maid olbmot oaivvildit dan birra. Oallugat liikojit goikeguollái, ja dá lea ge hirbmat álkes vuohki borrat guoli. Goikeguolis leat buot biebmoávdnasat ja lea máilmmi dearvvašlaš, lohká Ronny Slettmo.
Vuordimin ovdal go rabai
Jorid Hansen mátkkošta juohke jagi Viestterállasis SMAK festiválii.
Son válddii badjelasas eatnis beassegáhkkoláibbohaga 12 jagi áigi, ja diehtá bures ahte festiválas lihkostuvvet fitnodagat.
– Olbmot ledje vuordimin jo ovdal go festiválamárkanat rahpasedje. Mun láven visot jođihit ja lean maid olu buvddaiguin ožžon šiehtadusaid go lean leamaš SMAK festiválas. Dán márkana haga livččii ádjás bargu márkanfievrridit maiddái láibbohaga mii leamaš jo doaimmas 30 jagi, lohká Hansen.
