Dat árbevirolaš beassášipmilbálvalus Áisároaivvis lea šluhttejuvvon go Sámemiššuvdna lea gáržžidan njuolggadusaid gii sin visttiin oažžu lágidit girkolaš meanuid.
Dat árbevirolaš beassášipmilbálvalus Áisároaivvis lea šluhttejuvvon go Sámemiššuvdna lea gáržžidan njuolggadusaid gii sin visttiin oažžu lágidit girkolaš meanuid.
Homoliberála Hámmárfeastta báhppa Jon Arne Tandberg lea máŋga jagi doallan ipmilbálvalusa Áisaroaivvis Fálesnuori suohkanis vuosttaš beassášbeaivvi, muhto dan son ii sáhte šat dahkat, čállá NRK.
– Guoros girku ovdalii
Lea Sámemiššuvdna mii eaiggáduššá girku, ja leat sádden reivve Hámmárfeastta searvegoddái mas namuhuvvo ahte dušše báhpat, geain lea homofiliija oaidnu seamma dásis go Norgga Sámemiššuvnnas, ožžot girkolaš meanuid lágidit sin ipmilviesuin.
Tandberg ja eará báhpat geat dohkkehit homofiillaid eai sáhte de čađahit girkolaš meanuid sámemiššuvnna girkuin.
– Munnje lea váivi go šattan šluhttet ipmilbálvalusa duoddaris. Risttalaččat čoagganit beassážiid ávvudit beassážiid ja Jesusa bajásčuožžileami, muhto Sámemiššuvdna háliida ovdalii girku leat guorosin vuosttaš beassášbeaivvi, lohká Tandberg NRK:i.
Ii loga hilgon
Norgga sámemiššuvnna beaivválaš jođiheaddji, Roald Gundersen, biehttala Tandberga čuoččuhusaid ahte ii oaččo lobi girkolaš meanuid lágidit Áisaroaivvi kapeallas. Son čujuha ahte sii leat dušše sádden e-boastta ahte báhpat, geain lea seamma homofiliija oaidnu go sámemiššuvnnas, besset lágidit girkolaš meanuid sin ipmilviesuin.
– Nu ahte son rievtti mielde ii leat hilgojuvvon girkolaš meanuid lágideames. Mu mielas lea ártet go dát ášši lea ilbman mediaide ovdal go mii leat ožžon vástádusa e-bostii man sáddiimet, lohká Gundersen.
(©NTB)
