-Almmuhus-
-Almmuhus-
-Almmuhus-
KULTUVRASlinCraze ja olbmát movttiidahtte ráppet sámegillii

SlinCraze ja olbmát movttiidahtte ráppet sámegillii

-

-

Su namma lea Jarsem Galkin, dahje YAR1Y, lea ráppen 2006 rájes, muhto easka dán mánu álggus almmuhii vuosttaš rap-lávlaga gielddasámegillii man namma lea «Nurash Inn» dahje «Nuoraid jietna». Lohpida ge eambbo lávlagiid gielddasámegillii.  

Váttis baicce dahkat riimma sámegillii go lohkat, ráppet. Vissa danne go in hálddaš eatnigiela.  Maiddái sámegielas leat ollu konsonántajietnadagat mat eai geahpit barggu, čilge Jarsem mo lea ráppet gielddasámegillii. Ráppen gielddasámegillii veahkeha maiddái oahppat giela.  

– Dát lea áiggi duohken, muhto dál jo dovddan ahte máhtán giela eambbo go ovdal. Jáhkán ráppen sámegillii veahkeha oahppat buorebut giela. 

 

– «Áhkku, visot lea ortnegis …»

Iežas ráppateavsttaid čilge ahte leat sihke veahá filosofalaš teavsttat, ráppa dili birra muđuige.  Lohká ii liiko mainstreamii ráppemis. Sámegiel lávlla šattai seaguhusteakstan.

Dás muitaluvvo ahte ráhkásmuvvan davvigávpogii, dan birra go bohten ruovttoluotta Lujávrái. Ahte áhkku veahá lei suhtus go lean barggu haga ja láittastuvven. Mun ges vástidan: «Áhkku, visot lea ortnegis, mun bohten báddet ođđa lávlagiid. Mun lean ráppar». Maiddái Nurash Inn birra veahá muitalin.

 

Dás vuolabealde beasat guldalit vuosttaš ráppema gielddasámegillii. Ášši joatkášuvvá vuollelis. 

Jarsem Galkin, dahje nu mo son iežas gohčoda, YAR1Y, ii leat čuojahan ollu gostege. Namuha moadde rap-konseartta Murmánskkas, Lujávrris, ja Nuoraid kulturdeaivvadeamis (UKM) 2011:s.

 

– Ovdal in obage fuomášan ahte ná ollu sámemusihkka gávdno  

«Nurash Inn», man birra Ávvir čálii ođđajagemánus, Jarsema mielas veahkehii gielddasámegillii ráppegoahtit.

– Sii čájehedje makkár dássi lea sin musihkas, ahte leat buot musihkalaš šlájat sápmelaččain doppe. Pop-, rock-, elektro-, rapmusihkka. Ráppas leat iešguđetlágan vuolit šlájat. Ovdal in obage fuomášan ahte ná ollu sámemusihkka gávdno.   

Son lohká SlinCraze movttiidahttán su ráppet sámegillii.

Soaitá SlinCraze movttiidahttán. Moai oahpásmuvaime jagi dassái go son finadii Murmánskkas konsearttain ja seammás lei ráhkadeame filmma. Liikojin movt son ráppe sámegillii. Dás lei juoidá earenoamáš.

 

Lohpida eambbo sámegiel lávlagiid

Vaikko alcces lohká váttisin sámegillii ráppet ja lea unnán geat ipmirdit man birra ráppe sámegillii, de aŋkke áigu almmuhit eambbo sámegiel lávlagiid.

Soitet mu barggu bokte nuorat ge beroštišgoahtit sámegielas. Nu ahte vurdet eambbo ráppa gielddasámegillii, loahpaha Lujávrri rap-artista Jarsem Galkin aka YAR1Y. 

-Almmuhus-