Norggas leat álgán eanet ja eanet atnit šleđggona. Dan čájehit Trygg Trafikk lohkamat. Lihkka leat duššo njealjis logi olbmos geat geavahit šleđggona go lea seavdnjat. Dasa lassin sáhttit lasihastit, ja lohkat ahte geavahit šleđggona dávjjit go maid dahkat. – Beare heittot, lohká Trygg Trafikk
Norggas leat álgán eanet ja eanet atnit šleđggona. Dan čájehit Trygg Trafikk lohkamat. Lihkka leat duššo njealjis logi olbmos geat geavahit šleđggona go lea seavdnjat. Dasa lassin sáhttit lasihastit, ja lohkat ahte geavahit šleđggona dávjjit go maid dahkat. – Beare heittot, lohká Trygg Trafikk
– Trygg Trafikk lea leamaš buot fylkkain, ja lohkan gallis atnet šleđggona, boaittobealluottain, ja guovddášluottain. Čájehuvvo ahte šleđggongeavaheapmi lassána. Diibmá geavahedje 35 proseanta šleđggona, dán jagi geavahedje 39 proseanta šleđggona, muitala Trygg Trafikk gulahallanhoavda Ann-Kathrin Årøen preassadieđáhusas.
Olles 24 000 lohkama leat čađahuvvon miehtá Norgga. Dá lea áidna fysalaš kárten šleđggongeavaheamis Norggas, ja dahkko ovttas Ipsps MMI fitnodagain.
Lasihastit veahá
Trygg Trafikk ii leat duhtávaš.
– Dát čájeha ahte guđas logi vázzis, eai oidno seavdnjadasas. Olbmot doivot ahte geavahit šleđggona dávjjit go maid dahket, lohká Årøen. Son jáhkká olbmot lasihit go muitalit man dávjá geavahit šleđggona.
Golggotmánus čađahii Trygg Trafikk iskkadeami ovttas TNS Kantar. Dan iskosis lohke olles 69 proseanta ahte geavahit šleđggona álo, dahje hui dávjá.
– Lea hirbmat stuora erohus. Measta čiežas logi olbmos lohket ahte geavahit šleđggona, muhto go lohkat, de čájehuvvo ahte duššo njealjis logi olbmos dahket dan. Olbmot berrejit jurddašit veaháš, ja álgit bargat dan maid lohket. Mii han diehtit ahte 80 proseanta biilavuddjiin leat vásihan várálaš dáhpáhusaid go eai leat oaidnán vázzi olbmo seavdnjadin, lohká Årøen.
Gávpogis eai geavat šleđggona
Gávpogis geavahit buot hárvvimusat šleđggoniid. 31 proseanta geavahedje šleđggona gávpotluottain, ja 47 proseanta geavahedje šleđggona go ledje boaittobealluottain vázzime.
Trygg Trafikk áigu muitalit ahte vaikko gávpogis leat čuovggat, de ii leat dat duššo buorre.
– Gáhttačuovggat ja eará biilačuovggat sáhttet muosihuhttit vuoddji, ja dalle ii soaitte vuoddji oaidnit du go ii leat šleđggon alge.
