Šleđggonbeaivvi čalmmustahttit dehálašvuođa muitit šleđggona go vánddarda seavdnjadin.
Duorastaga golggotmánu 21. beaivvi lea šleđggonbeaivi.
– Dát beaivi galgá muittuhit olbmuid man dehálaš lea geavahit šleđggona go vánddarda seavdnjadin, dadjá NAF gulahallanráđđeaddi Nils Sødal preassadieđáhusas.
Birrasii 15 proseantta, dahje 660 000 norgalačča badjel 18 jagi, eai geavat šleđggona. Dan čájeha guorahallan man Infact čađahii NAF ovddas golggotmánus diibmá.
– Šleđggon lea hálbbes dáhkádus. Lea hirbmat stuora erohus man bures oaidná olbmo geas lea ja geas ii leat šleđggon go vánddarda geaidno guora, lohká Sødal.
Gádju olbmo heakka
Biilavuoddji, gii vuodjá 50 kilomehtera diimmus, ii fuomáš olbmo šleđggona haga ovdal lea 25-30 mehtera sus eret. Jus lea šleđggon, de fuomáša biilavuoddji olbmo 140 mehtera duohken. Dalle lea biilavuoddjis olu buoret áigi reageret.
Jus sekunddaid mihtida dán ektui, de lea biilavuoddjis logi sekundda áigi reageret go fuomáša olbmo geas lea šleđggon. Jus olbmos ii leat šleđggon, de lea biilavuoddjis dušše 2 sekundda áigi reageret.
– Šleđggon sáhttá gádjut olbmo heakka ja jus ii geavat šleđggona, de sáhttá olmmoš jápmit johtolagas, lohká Sødal.
NAF rávvagat
NAF rávve olbmuid geavahit šleđggona seavdnjadin, maiddái go vánddardat geaidnoráigge gos leat čuovggat.
Šleđggonveasta lea buoremus. Eará šleđggonat berrejit heaŋgát čibbeallodagas.
Jus dus lea veasku, lávka dahje jáhkka man geavahat beaivválaččat, de ávžžuha NAF diktit das orrut šleđggona.
Muitte álo bidjat šleđggona mánnái.
