Váhnen oaivvilda giellagáhttenprošeakta skuvllas ii leat doarvái bures plánejuvvon, go dárogielat luohká mánná šattai vásihit givssideami dan geažil.
Váhnen oaivvilda giellagáhttenprošeakta skuvllas ii leat doarvái bures plánejuvvon, go dárogielat luohká mánná šattai vásihit givssideami dan geažil.
Guovdageainnu mánáidskuvllas lea okta luohkká bidjan johtui giellagáhttenprošeavtta, mas ulbmil lea sámástettiin garvit seaguheames dárogiela sániiguin. Prošeavtta oktavuođas leat oahppit ráhkadan plakáhtaid masa leat čállán sámegillii, ja heŋgon daid skuvlla seinniide.
Givssiduvvon
Dárogielat luohká mánná vásihii ikte givssideami skuvllas dan giellaprošeavtta oktavuođas, ja váhnen, guhte ii hálit nama almmuhit, mielas lea dat suorggahahtti.
– Mu mánná muitalii ahte sámegielat luohká mánát vázze plakáhtaiguin ja lohke “buohkat galget hupmat sámegiela go dá lea sámi báiki” ja ” jus ehpet máhte sámegiela, de ehpet gula deikke”. Mun mielas gal orro dat vealaheapmi, lohká váhnen.
Boastu ipmárdusa
Váhnen lohká prošeakta iešalddis lea hui buorre, go lea dehálaš gáhttet sámegiela, muhto orro hejot plánejuvvon.
– Mun goit in lean gullánge prošeavtta birra, ja ii oro dárogielat skuvlamánáid birra jurddašan, geat eai oba soaittege hálddašit sámegiela. Váhnen lea maid leamaš oktavuođas eará váhnemiiguin geat ledje oaidnán plákáhtaid seinniin, ja moaitán daid danne go sáhttet boastut ipmirduvvot. Váhnen maid oaivvilda ahte manne lea dárbu mánáidskuvllas sirret sámegielat ja dárogielat mánáid, go nuoraidskuvllas goitge sehkejuvvot ovtta luohkkái buohkat.
Guovdageainnu mánáidskuvlla rektor Marit Kristine Hætta Sara čujuha suohkana kultuvra ja bajásšaddan ovttadatjođiheaddjái Bodil Utsi Vars vástidit áššis.
Čorgen dili
Utsi Vars lohká lea váidalahtti jus giellagáhtten prošeakta dagahan givssideami skuvllas, ja lea ságastallan skuvllain dan birra.
– Nu movt mun lean ipmirdin de lea skuvllas juo gulahallan eará luohkáiguin ja čorgen dili dan givssideami ektui. Dat lea dehálaš go skuvla lea servvodatásahus man ulbmil lea eastadit givssideami.
Ráinnas sámegiella
Utsi Vars čilge giellagáhttenprošeavttas leat oahppit ráhkadan plakáhtaid mas čalmmustahttet ráinnas sámegiela ja leat maid doallan logaldallamiid fáttá birra eará luohkáin.
– Mánát leat maid prošeavttaš fuomášan ieža man ollu sii seaguhit dárogiela ja maid eaŋgalasgiela go hupmet sámegiela. Dat prošeakta lea oassin oahppolánain maid skuvllat leat geatnegáhtton čuovvut, ja ferte atnet muittus man hearkkes dilis min giella lea, lohká son.
Eahpe čielggas
Utsi Vars mieđiha ahte soaitá leamaš heajos diehtojuohkin siskkáldasat skuvlla bealis prošeavtta birra.
– Lea hui šállošahtti jus lea boastut ipmirduvvon, ja mun ipmirdan ahte sáhttá leamaš eahpe čielggas ulbmila ektui. Jus mánát eai ii ipmir mii čuoččo čállojuvvon, de sáhttá dovdat iežas olggobealde vaikko dat ii leat jurdda, lohká son.
