-Almmuhus-
OĐĐASATSkohteriin doddjui jávrái

Skohteriin doddjui jávrái

-

-

– Viggen lohkat ahte ii leat dárbbašlaš sáddet helikoptera, muhto heahtetelefovnnas lohke ahte leat juo sádden, muitala boazoeaiggát.

Dán giđa lea erenoamáš guhka bistán muohta, mii maid mearkkaša ahte boazodoallit eai vel goastta njealjejuvllagiin vuodjit. 

Máhtte Niillas Gaup muitala bártti birra man vásihii mannan vahkkoloahpa.

Son lei ealu vuodjime guottetbáikkis, nuorttabealde Máze, go galggai rasttildit ovtta jávrri. Go lei ollen sullii 50 mehtera eret gáttis de iđii boares stráŋgabuntta jieŋas, ja son šattai dan garvvistit.

Go leahttu nogai skohteris, de skohter čalggihii jieŋa čađa, ja bisánii.

 

Jurddašii gálistit


DODDJUI JÁVRÁI: Boazodoalli Máhtte Niillas Gaup doddjui jávrái skohteriin, ja Sea-King helikopter fertii boahtit su gádjut. Vuorkágovva: Nils Johan Vars

Birra lei dušše nállojiekŋa, ja Máhtte Niillas ii beassan jieŋa ala.

Juste dakko lei oalle coagis, bađa rádjái čáhci, ja Gaup čuoččastii skohtersete ala vai ii njuoskka.

– Álgen jurddašit galggan go gállit, ii livčče go 50 mehtera, muhto čáhci lei nu galmmas. Bartii livččii golbma kilomehtera, ollen mun gal, muhto galbmon ja njuoskkan, muitala Gaup ahte son jurddašii go čuččodii skohtera alde.

Son lasiha maid ahte jus ii livčče dárbbašan garvilit stráŋgabuntta, de livččii jiekŋa guoddán njuolggomanni skohtera.

 

– Ii leat dárbbašlaš helikoptera sáddet

Son álggii riŋgedit oahpes olbmuide Mázes, ja loahpas vástidii su áhkku.

Go su áhkku gulai makkár bártái áhkkut lei geavvan, de riŋgii heahtetelefovdnii ja siđai helikoptera sáddet, vaikko Máhtte Niillas vikkai áhkkui muitalit ahte ii leat dárbbašlaš.

Heahtetelefovnnas de čuojahedje Máhtte Niillasii.

– Viggen vel lohkat heahtetelefovdnii ahte eai dárbbat boahtit. Lohken ahte in mun heavvan gal go ii leat nu čieŋal, muhto njuoskkan jus gállilan ja guhkki lea bartii vázzit. Ledjen vel ožžon ovtta olbmá ságaide, muhto sii lohke ahte galggan bissut gos lean, go sii ledje juo sádden helikoptera, muitala Máhtte Niillas.

Helikopter bođii ja loktii Máhtte Niillasa gáddái. Skuter bázii jávrái, muhto dan lea maŋŋil fas viežžan.

Ii lean billahuvvan, ja sáhtii vuoddját fas dainna.

 

Loga maid: Sea-King gájui dievddu jieŋa alde

 

Liikká buorre go bohte

Vaikko juste dalle Máhtte Niillasa mielas ii lean dárbbašlaš oažžut veahki heahtehelikopteris, de lea maŋŋil fas jurddašan ahte dat lei riekta.

– Olmmoš han jurddaša ahte go ii leat jur jápmaheahti, de eai dárbbaš boahtit. Muhto fas jurddašan ahte danne han heahteveahkit leat, go galget olbmuid veahkehit. Jus livččen gállit šaddan, olmmoš dat gal galbmosta ovttatmano. Lei buorre go bohte, in ge dárbbašan eambbo bártidit, lohká Gaup.

Son muitala ahte lea máŋgii juo doddjon, muhto ii leat vel bálton jieŋain.

Muhto dál lea fuomášan man várálaš jiekŋa sáhttá leat, vaikko orru vielgat, de sáhttet čáhppes ráiggit.

-Almmuhus-