Leavdnjalaš Skjalg Jensen vádjolii eret miessemánu 18. beaivvi 2016 48-jahkásažžan. Son lei riegádan Leavnnjas Porsáŋggu gielddas čakčamánu 29. beaivvi 1967.
Leavdnjalaš Skjalg Jensen vádjolii eret miessemánu 18. beaivvi 2016 48-jahkásažžan. Son lei riegádan Leavnnjas Porsáŋggu gielddas čakčamánu 29. beaivvi 1967.
– Skjalg barggai journalistan Ságat aviissas guovvamánu 2015 rájes gitta cuoŋománu 2016 lohppii. Son lei aiddo álgán jođiheaddjin dorvoohcciguovddážis Leavnnjas miessemánu álggus, lohká Ságat váldodoaimmaheaddji Geir Wulff.
Son muitala iežas dovdan Skjalg Jensen su mánnávuođa rájes. Skjalg Jensen bargagođii journalistan 19-jahkásažžan Radio Porsangeris 1986:s gitta 1991 rádjái, go bargagođii NRK Finnmárkkus, vuos journalistan ja dasto vuorrohoavdan gitta 2011:i. Skjalg Jensen lei maid earret eará Finnmárkku Journalistasearvvi jođiheaddji.
– Skjalg lei hui čeahpes journalista ja dovddai servodaga bures, sus lei stuorra fierpmádat ja dál leat massán ovtta min čeahpimus journalisttain. Hui suddu. Mii leat buohkat morrašis go leat massán čeahpes journalistta ja buorre verdde dahje skihpára, lohká Ságat váldodoaimmaheaddji Geir Wulff.
Skjalg Jensen hávdáduvvo Hámmárfeasta kirkus boahtte bearjadaga, miessemánu 27. beaivvi.
NRK bargin
Okta Skjalg Jensena bargoskihpáriin lea NRK journalista Johannes Kalvemo.
– Oahpásmuvven Skjalgain fágasearvvi bokte go lei NRK doaimmaheaddji. Son lei hui dárkil ja suokkardii áššiid. Sus eai lean čohka gardnjilat, muhto juvssai olbmuid áššálaš ja ráfálaš bargovugiin. Sus lei erenoamáš beroštupmi mearrasámi, sámeguovllu ja Finnmárkku ektui, muitala Johannes Kalvemo.
Son muitala barggu bokte šattai Skjalg buorre ustit ja bargoskibir, ja lei somá suinna digaštallat servodat áššiid go sus lei nu stuorra servodatberoštupmi. Kalvemo lohká su mielas lea lossat gullat ahte Skjalg Jensen ii leat min gaskas šat.
Sámediggeáirras
– Mun dovden Skjalg sihke áirrasin ja journalistan. Mu mielas lei son hirbmat buorre journalista, jurddašeaddji ja bures áššiid siste. Seamma láhkai lei son maid sámediggeáirrasin, barggai hui vuđolaččat, lohká ovddeš sámediggepresideanta Egil Olli iežas bellodatskihpára birra.
Olli mielas lei Skjalg Jenseniin hui álki ovttasbargat.
