-Almmuhus-
OĐĐASATSkihpa luossa gávdnon Murmánskka jogain

Skihpa luossa gávdnon Murmánskka jogain

-

-

Guoládagas gávdne skihpa luosaid lahka Murmánskka jogain, dieđihit guovllu eiseválddit.

Kola ja Tuloma jogain leat dán mánu gávdnon skihpa luosat nu go diibmá. Dan oktavuođas guovllu eiseválddit leat doallan čoahkkima ikte.

Gozihanbarggu mielde gávdnui dán jagi skihpa luossa lei vuos Kola ja Tuloma jogain. Eará čázádagain Guoládatnjárggas skihpa luossa ii leat fuomášuvvon, muitala vuosttaš Murmánskka fylkka várresátnejođiheaddji Aleksey Tjukavin B-port ođasdoaimmahussii.

Seammás deattuhit ahte guolledávda ii leat váralaš olbmui, muhto skihpa luossa sáhttá geahnohuvvat ja danin sáhttet lussii álkit njoammut eará dávddat.

 

Gulaskuddat Norggain

Eiseválddit oaivvildit ahte soitet gávdnat čovdosiid jus gulaskuddet Norggain ášši oktavuođas.

Lea dárbu váldit ášši ovdan Norgga ja Ruošša kommišuvnnain vai digaštallat gozihanbarggu bohtosiid, ja maiddái ohcan dihte vejolaš čovdosiid áššis.

Eiseválddit bivdet maiddái veahki guolásteddjiin goddit skihpa luosaid vai dutkit besset iskat daid luosaid.

 

 

 

 

 

 

-Almmuhus-