Áktor, Andreas Nyberg, lohká dušše registreren ahte Skiellet diggegottis lea eará oaidnu áššis go sus lea.
Bearjadaga juovlamánu 30. beaivvi 2016:s, celkkii Skielleha diggegoddi duomu goddináššis Morö Backe torgas, gos goalmmátlot-jahkásaš Guovdageainnu dievdu čuggii 20-jahkásaš Ruoŧa dievddu jámas.
Diggegoddi dadjá ahte son lea sivaheapme iešmielat, dahje eahpedáhtolaččat, goddán Ruoŧa dievddu.
Lei vuordán duomu
Áktor áššis, Andreas Nyberg, lohká iežas vuordán ahte duopmu boahtá áššis.
Son lei čuoččuhan ahte Guovdageainnu dievdu galgá logi jagi čohkkát giddagasas, jus diggi gávnnaha ahte lea iešdáhtos goddán.
Jus eahpedáhtolaččat gávnnahit su goddán Ruoŧa dievddu, de galget gávcci jagi giddagassii dubmet su.
– Mun dušše registreren ahte diggegottis lea eará oaidnu áššis go mus lea. Mun oainnán ahte dat mii dagahii ahte son dáin áššáskuhttinosiin ii dubmehallan lei go diggi oaivvildii ahte son lea iežas várjaleami oktavuođas goddán Ruoŧa dievddu, lohká Nyberg.
Arvvoštallá guoddalit
Nyberg lea aiddo boahtán ruoktot luomus, ii ge leat beassan dárkilit lohkat duomu.
– Mun ferten vuos beassat lohkat duomu, ovdal go mearridan berret go guoddalit ášši. In sáhte dadjat maidege árvvoštalan go guoddalit vai in, na in goit juste dál daja dasa maidege, lohká son loahpas vel.
