Greta Thunberg Foundation háliida veahkehit Ruoŧa beale badjeolbmuid Jåhkågasska čearus gokčat áššegoluid.
Beowulf ruvkefitnodat lea mannan giđa ožžon lobi Ruoŧa stáhtas álggahit ruvkedoaimma Jåhkågasska čearu guohtuneatnamiin. Jåhkågaska čearru geahččala dan guoddalit.
– Das lea olu bargu ja seammás dat lea divrras, danin mii leat hui giitevaččat. Mii sávvat ahte jus min guoddalemiin manná bures, de visot máhcahuvvo Ruoŧa stáhtii, ja mii oažžut buoret dili, lohká Jåhkågasska čearu ovdaolmmoš, Jon-Mikko Länta The Guardian aviisii.
Jåhkågasska čearu badjeolbmot leat olu jagiid dáistalan ruvkedoaimmaid vuostá mat plánejuvvojit sin guohtuneatnamiidda Johkamohki gielddas.
