-Almmuhus-
OĐĐASATSkeŋkejit ealgga boarrásiid- ja buhcciidruktui

Skeŋkejit ealgga boarrásiid- ja buhcciidruktui

-

-

Kárášjoga gielda lea iežaset 150 jagi ávvudeami oktavuođas ožžon FeFos ealgga.

 

 

Kárášjoga gielda lea ánuhan ja ožžon FeFos nuvttá ealgga, man áigot skeŋket boarrásiid- ja buhcciidruktui. FeFo lei mielas addit ealgga, variha dahje vuotnjala, gildii, ja dál leat maid bivdit sajis geat galget njeaidit dan ealgga.

 

Ohcan bivdojoavkkuid

Ealgabivdinsearvvi jođiheaddji Jan Idar Somby muitala sis jerrui organiseret praktihkalaš beliid das, danne go sii dovdet bivdojoavkkuid, ja maid dihtet geain lea gáibiduvvon «sarvvaelliid fealtadárkkisteami» kursa.
– Eaktun bivdojoavkkuide lei ahte okta joavkkus lea čađahan kurssa, ja mii jearaimet dain  bivdojoavkkuin geain livččii beroštupmi váldit badjelasaset barggu. Eat mii vuordán nu issoras stuora beroštumi, go jáhkkimis eatnasat háliidit alcceseaset bivdit, lohká Somby.

 

Golbma joavkku

Sivva manne ealgabivdinsearvi ozai golbma joavku lea go áigot sihkkarastit ahte boarrásiid- ja buhcciidruoktu oažžu ealgga.
– Mii leat gávdnan golbma  bivdojoavku, ja dat leat Roald Solbakken bivdojoavku, Jan Varsi bivdojoavku ja Kurt Are Boine Nikkinen bivdojoavku.

 

2000 ruvnno bálkán

Bivdojoavku mii njeaidá ealgga oažžu 2000 ruvnno gielddas. Bálká guoská njeaidimii, njaldimii, rihttemii, vihkkemii ja geaseheapmái dearvvašvuođa gievkkanii.

Bivdojoavkkut ožžot ovdal bivddu ovtta liigebivdogoarta nuorra eallái, ja go njeidet, de dieđihit telefuvnna bokte FeFoi.

Bivdojoavku maiddái dieđiha daidda eará bivdojoavkkuide go ealga lea báhččon.

Ealga vihkkejuvvo FeFo vihkkenstašuvnnas ja dolvojuvvo dearvvašvuođaguovddážii.

 

Barget buriin mielain

Okta bivdojoavku mii lea mielde, Jan Varsi bivdojoavku, lea mielde danne go ealga galgá boarrásiidda. Jan Varsi lohká jus juo lea sin joavku mii njeaidá dan ealgga, das dieđusge lea ollu liigebargu.
– Vaikko leage ollu liigebargu, de gal mii buriin mielain dan bargat, go das boahtá boarrásiidda ávkin. Lean maid jurddašan, jus oažžut vejolašvuođa, váldit vara ja čoavjebuiddiid, vai besset maiddái gumppostit, lohká Varsi.

 

Áigá ráhkkánišgoahtán

Dál lea badjelaš guokte vahkku dassái go bivdu álgá Kárášjogas, ja Varsi, gii lea ealggaid bivdán fargga 40 jagi, lohká áigá juo ráhkkanišgoahtán dasa.
– Go lea dan mađe guhká bivdán, de gal láve juo go bivdu nohká čakčat, álgit hutkat nuppi jagi bivddu birra, lohká son. Su bivdojoavku galgá dán jagi bivdit Sávkadas guovllus.

 

Ealgabivdu álgá Kárášjogas čakčamánu 1. beaivvi.

-Almmuhus-