-Almmuhus-
-Almmuhus-
-Almmuhus-
OĐĐASATSkeŋkejit 600 000 ruvnnu

Skeŋkejit 600 000 ruvnnu

-

-

Golbma Finnmárkku aviissa besset addit ruđa ruovttoluotta lagasbirrasii go konseardna lea addán 600.000 ruvnno mii galgá skeŋkejuvvot Finnmárkku servviide dahje doaimmaide. 

Amedia lea riikka stuorimus buvttadeaddji báikkálaš mediaide ja konseardna doaimmahuslaš mielbargit olahit sullii 1,9 miljovnna lohkki beaivái. Amedia vuolde leat 73 báikkálaš media ja doaimmahusat barget beaivválaččat olahit báikkálaš ođđasiiguin čalmmustahttit olbmuide mii gullo ja dáhpáhuvvá.

Dál lea Amedia mearridan ahte galget juohkit 25 miljovnna ruvnno báikkálaš joavkkuide ja servviide, geat barget juoidá buori lagasbirrasii. Juohke media galgá skeŋket ruhtaskeaŋkka iežaset suohkana siste.

600.000 ruvnno

Amedia konseartnas gávdná maiddái finnmárkkuaviisaid Finnmarken, Finnmark dagbladet ja Finnmarksposten. Ávvir lea hupman Finnmarken vástideaddji redaktevrrain Anniken Renslo Sandvikain ja son muitala ahte sis lea 600.000 ruvdno maid galget juohkit miehtá Finnmárkku. Ja sii leat golbma aviisa geat barget ovttas dáinna ruhtajuohkimiin.

— Mii leat golbma báikkálaš aviissa, Finnmarken, Finnmark Dagblad ja Finnmarksposten, geat álo leat beroštan das mii dáhpáhuvvá báikkálaš servodagas. Ja dál mii oažžut oamasteddjiin dan vejolašvuođa ahte addit juoidá ruovttoluotta servodahkii. Dát lea juoga máid konseardna lea bidjan johtui ja go mii oažžut vejolašvuođa oassálastit, de lea dušše buorre go mii beassat leat mielde váikkuheame báikkálaš servodaga, muitala Finnmarken vástideaddji redaktevra Anniken Renslo Sandvik.

Eai leat ollu gáibadusat

Sandvik muitala ahte eai leat nu ollu gáibádusat earret go ahte ferte leat joavku dahje searvi, ja ii ábut leat politihkalaš dahje oskkolaš vuođđoulbmil go ohcá doarjaga. Muhto muđui gal sáhttet buot eaktodáhtolaš searvvit ohcat.

— Leat joavkut ja searvit geat sáhttet ohcat, muhto jus lea politihkalaš dahje oskkolaš vuođđoulbmil searvvis de ii sáhte ohcat. Muhto buohkat geat barget eaktodáhtolaš bargguiguin sáhttet ohcat.

Nuoraide jurddašuvvon

Sandvik muitala ahte leat jurddašan nuoraid vuoruhit, muhto dat maid ii leat eaktun.

— Ja lea maiddái smávvá gáibádus ahte doaimma ruhta galget mannat nuoraide geat leat vuollel 25 jagi, muhto ii leat dušše sidjiide jurddašuvvon. Dát doarjja sáhttá leat ávkin maiddái earáide, muhto nuoraidgeardi dat lea jurdagiin, muitala Sandvik. 

Sávvet ohcet doarjagiid 

Sandvik dadjá maiddái ahte ohcanáigemearri lea njukčamánu 25. beaivvi, ja sávvet ahte olbmot ohcet doarjagiid. Ohcanskovvi lea elektrovnnalaš skovvi.

— Dát proseassa lea dáinna lágin ahte olbmot fertejit sáddet ohcamuša. Mii leat ráhkadan portála, nu ahte visot dáhpáhuvvá elektrovnnalaččat. Go ohcanáigemearri lea dievvan, de mii mannát ohcamušaid čađa ja veardidit geat dat galget oažžut doarjaga.

Olles Finnmárkui ávkin

Amedia aviissat Finnmárkkus dáhttot ahte doarjja boahtá buorrin visot Finnmárkku joavkkuide ja servviide ja áigot geahččalit nu viidát go vejolaš juohkit ruđaid.

—Mii áigut geahččat ahte boahtá buorrin olles Finnmárkui, go Finnmárku lea hui stuora fylka, ja mii háliidit ahte ruđat galget ávkin nu olusiidda go vejolaš. Ja ahte buorit doaimmat ožžot ruđa. Mađi eanet doaimmat ožžot dáid ruđaid buorrin, dađi buoret, dadjá Sandvik.

Amedia konseardna juolluda 25 miljovnna ruvnno báikkálaš mediaide, maid galget juohkit báikkálaš joavkkuide ja servviide. Govven: Amedia
Amedia konseardna juolluda 25 miljovnna ruvnno báikkálaš mediaide, maid galget juohkit báikkálaš joavkkuide ja servviide. Govven: Amedia

 Iešguđet supmit áviissaide

Amedia muitala preassadieđáhusas ahte leat veaháš iešguđetge supmit maid ásahusat ožžot, go lea mediaásahusa sturrodat mii mearrida dan. Muhtimat ožžot 100.000 ruvnno ja earát fas ožžot miljovnna. Danne sávvá Amedia ahte sáhttá šaddat buorrin báikkálaččat.

— Min áviissaid váldobargun lea movttiidahttit lohkkiid ja buohkaid geat orrot báikkálaš servodagain searvat báikkálaš digaštallamiidda, eaktodáhtolaš bargguide ja kultuvrii. Dál mii dáhttut nannet oktavuođaid gaskal Amedia áviissaid ja báikkálaš servodagaid, muitala Amedia konseardnahoavda Are Stokestad preassadieđáhusas.

Buorit bohtosat

Stokestad muitala preassadieđáhusas ahte vuođđun ruhtajuohkimii dál, lea dat buorre boađus mii Amedias leamaš 2018:s. Dát lea ovttasbargu Seastinbáŋkuvuođđudusain DNB:in.

— Jus buorit bohtosat jotket, de sáhttá ruhtajuohkin maid joatkit min aviisain, dadjá son.

Loga eanet ášši birra IFinnmark neahttasiidduin

-Almmuhus-