Ávvir áigu juohkit oktiibuot 100 000 ruvnno válljejuvvon vuostáiváldiide.
Ávvira Stivra mearridii stivračoahkkimis juolludit oktiibuot 100 000 ruvnno go dán jagi lea Ávvir borjjastan miehtebiekkas.
Beaivválaš jođiheaddji Tor Sara lohká ahte sii áigot addit juoidá ruovttoluotta.
– Mis lea buorre jahki leamaš mas lohkkiidlogut ja diŋgojeaddjit lea lassánan, ja de mii áigut addit juoidá ruovttoluotta iežamet lohkkiide. Jurdda leat addit ásahusaide, servviide ja eaktedáhtolaš servviide mat leat min váldoguovlluin ja mat dárbbašit veahki, dadjá Sara.
Vuosttaš have
Dakkár skeaŋkka ii leat Ávvir ovdal addán, vaikko lea ovdal sponsorin leamaš earret eará spábbačiekčamiidda.
– Dál lea vuosttaš háve go mii geavahit badjelbáhcaga ja addit ruovttoluotta lohkkiide ja servodahkii gos mii eallit, muitala Tor Sara ja lohká ahte sii áigot lohkkiid evttohusaid.
Báikkálaš olbmot dihtet buoremusat
Váldodoaimmaheaddji Kari Lisbeth Hermansen bovde olbmuid evttohit buriid kandidáhtaid.
– Mii dahkat dan go jurddašit ahte lohkkit dovdet iežaset báikkálaš servodagaid buoremusat ja makkár dárbbut doppe leat. De addit mii lohkkiide vejolašvuođa čalmmustahttit iežaset báikegotti ja mii doppe livččii buorre ulbmil maid mii sáhtášeimmet doarju, dadjá Hermansen ja sávvá ahte ožžot viidát evttohusaid. Lea de Ávvira jođiheaddjejoavku mii de vállje ulbmiliid.
Eallinmovtta buktit
Hermansen muitala ahte sii áigot ahte ruhta galgá mannat muhtumii dahje muhtumiidda main eai leat nu ollu ruđalaš návccat.
– Ii fal ovttaskas olbmui, muhto nu go searvi dahje ásahus vai juoga ládje buktit movtta dohko. Anán ovdamearkan boarrásiidsiidda, jus mii sáhttit dohko oastit juoidá maid geavaheaddjit dárbbašit. Juoga masa ii leat bušeahtas sis ruhta, juoga liige mii buktá eallinmovtta.
– Servodagas lea nu ahte buot servviin ja servodatjoavkkuin ii leat nu buorre dilli, ja mii áigut daid veahá loktet, muitala Hermansen. Doaibmi neahttajođiheaddji Marit Elin Kemi lasiha ahte áinnas áigot addit dakkár ulbmiliidda mat leat ávkin earáide.
Evttohusat
Olbmot sáhttet evttohit Ávvirii gitta ođđajagemánu 5. beaivvi rádjái.
– Ii leat daddjon ahte mii addit ovtta ulbmilii, mii sáhttit juohkit dan unnit ulbmiliidda maid, muitala Hermansen, gii illuda juohkit ruđa servodahkii.
– Lea hui dehálaš go aviissa ceavzin lea dan duohken ahte das lea doarjja dan servodagas gos dat lea. Go mii vásihit ahte mis leat buorit logut ja olbmot leat bures váldán vuostá min fálaldaga, de háliidit mii maid addit juoidá ruovttoluotta servodahkii.
Ná sáddet evttohusa:
Čális masa/maidda evttohat mii galgat addit doarjaga. Čális maid oanehis čilgehusa manne galggašeimmet juste dán ulbmila doarjut.
Sáddes iežat evttohusa: post@avvir.no
Sáhtát maid sáddet dieđu mátketelefovnnain: Čále vuos ÁVVIR (iežat evttohusa, čilgehusa ja iežat nama) ja sádde sms deike: tlf.nr. 2470
Áigemearri: 05.01.2020.
