Erlend Elias vuittii bálkkašumi, ruhtaskeaŋka galgá ovddidit sámi homofiillaid dili.
Divttasvuotnalaš Erlend Elias Bragstad válljejuvvui gieskat dán jagi «homotopp:an». Vuoitin beassá son válljet muhtin prošeavtta dahje organisašuvnna man Gaysir doarju 20.000 ruvnnuin. Erlend Elias lea válljen doarjut eará sápmelaš homofiillaid.
– Queer Sámit dahket dehálaš barggu
Sámi stylistta ja hábmejeaddji Erlend Elias Bragstad lea válljen doarjut Queer Sámit, organisašuvdna mii ovddida sámi homofiillaid, lesbaid, bifiillaid, trans-seksualálaččaid ja queeraid.
– Dutkan čájeha ahte sámi homofiillain lea sakka vearrát bajásšaddan go eará homofiillain. Bávččagahttá sakka diehtit ahte dilálašvuohta lea ná jagi 2015:s, danin lea mu mielas Queer Sámiid áŋgiruššan hui dehálaš, lohká Bragstad Gaysir neahttasiidui.
Illudit
Erlend Elias lea mearridan ahte ruhtaskeaŋkka Queer Sámiide leat bealljemerkejuvvon plakáhtaide ja diehtojuohkingihppagiidda. Dát galget heŋgejuvvot ja juogaduvvot nuoraidskuvllain ja joatkkaskuvllain. Diehtojuohkin galgá ávkin sidjiide geat dárbbašit veahki dahje soapmása geainna besset háleštit.
– Illudahttá sakka ahte oažžut ruhtaskeaŋkka. Dát lea ávkin álgodoaimmaiguin ja mii oažžut vejolašvuođa ovddidit iežamet barggu miehtá Sámi, lohká Queer Sámit stivraláhttu Leammuid Lemet Ánde.
