Mázelaš Marit Helene Eira ii loga leat ámmát govvejeaddji, muhto lea jo nuppi govvengilvvu vuoitán.
Mázelaš Marit Helene Eira ii loga leat ámmát govvejeaddji, muhto lea jo nuppi govvengilvvu vuoitán.
Mannan čavčča lágidii Bygdekvinnelag nammasaš searvi govvengilvvu man fáddan lei “mu čakčatuvra lea…” dahje “#minhøsttur…”. Mázelaš Marit Helene Eira lei okta dain gii lei searvan dán govvengilvui. Ja vuittii gilvvu.
– Hui somá han lei sáddet juste dien gova gilvui, go mii leimmet nissonolbmot tuvrras ovtta gilis. Ii govva leat plánejuvvon ja orgeniserejuvvon govvemii. Dat lei nu somás motiiva go ledje váccašeame, go leimmet manname murjet, čilge Marit Helene gova birra.
Marit Helene Eira. Govven: Kari Lisbeth Hermansen
Skeaŋkamátki buvttii vuoittu
Marit Helene Eira lohká ieš dan tuvrras gos govvii dán vuoitogova lei jo vuoitán eará govvengilvvus.
– Dat gilli gos leimmet, lei Hønseby sievjjus. Doppe leimmet dan dihte go ledjen vuoitán govvengilvvus maid Seiland álbmotmeahcci lágidii mannan dálvvi. Vuoitu das lei vahkkoloahppatuvra viđa olbmui, masa čuovui vel guollebivdotuvra. Lei somá, muitala Marit Helene Eira.
Seiland álbmotmeahcci geográfalaččat lea golmma suohkanis Álttás, Hámmárfeasttas ja Fálesnuoris Finnmárkku fylkkas.
Bygdekvinnelag nammasaš searvi lea lágidan dán govvengilvvu oassin iežas prošeavttas, man namma lea “Gilli lihkadusas” dahje “Bygda i bevegelse”. Gilvu lágiduvvui buot sosiála mediaid bokte. Gáibádussan lei geavahit rievttes fáddágilkora mii lei #minhøsttur, #bygdekvinner ja #bygdaibevegelse. Searvi oaidná iežas ulbmilin fállat deaivvadanbáikki aktiivvalaš nissoniidda.
– In dieđe nu sihkkarit mii diet Bygdekvinnelag lea. Čuovun sin facebookas, orrot bargamin buori barggu. Buohkain lei riekti leat mielde dan gilvvus. Dat govva mainna serven, govvidii hui bures juste dán gilvofáttá. Mun vuiten dás fjellräven buvssaid, čilge Eira.
– Somás ástoáiggehommá
Ávvira journalista lei sáhkki, danin jearai ge láve go Marit Helene dávjá searvat gilvvuide ja makkár gilvvuide.
– In searvva dávjá, earágo orro heiveme. Norggas fal dušše searvvan. Eai juo nie buorit govat gal leat mus ahte heive sáddet National Geographic:i, mojiin muitala Eira ja lasiha vel.
– Ii hal dát govven leat earágo somás ástoáiggehommá, lohká govvejeaddji.
