Beakkán sápmelaš juoigi Jon Henrik Fjällgren ja davvi-norgalaš lávlladáiddár Tonje Unstad leaba dán jagi Skápmajienat artisttat. Buvttadeaddji lohpida erenomáš konseartavásáhusa.
Beakkán sápmelaš juoigi Jon Henrik Fjällgren ja davvi-norgalaš lávlladáiddár Tonje Unstad leaba dán jagi Skápmajienat artisttat. Buvttadeaddji lohpida erenomáš konseartavásáhusa.
Scene Finnmark lágida jahkásaččat Skápmajienat konsearttaid.
Dán jagi besset olbmot vásihit Jon Henrik Fjällgren ja Tonje Unstad seamma lávddis.
– Mii leat álo hui duhtavaččat iežamet artisttaiguin. Dál čevllohallat erenomážit go leat ožžon Jon Henrik Fjällgrena mielde. Soai leaba Tonje Unstadin buoremusaid searvvis ja lea hui gelddolaš ovttastahttit sudno, lohká Scene Finnmark Skápmajienaid buvttadeaddji Hans Stapnes.
Vuoitit lávddi alde
Tonje Unstad lea davvi-norgalaš lávlladáiddár. Son lávlu sihke mánáide ja ollesolbmuide, ja dán čavčča almmuha son ođđa skearru.
Unstad lea ožžon máŋga bálkkašumi, earret eará lea vuoitán guokte Spellemannsbálkkašumi.
Jon Henrik Fjällgren lea máttasápmelaš juoigi ja badjeolmmoš. Son šattai dovddusin go vuittii Ruoŧa taleantagilvvu «Talang» 2014:s.
Son lea maiddái oasálastán Ruoŧa Melodifestiválas. Fjällgren almmuhii iežas vuosttaš skearru diibmá.
Guorahallaba nubbi nuppi musihka
Artistta guovttos gullaba guovttelágan musihkkamáilbmái, ja danin oaivvilda Skápmajienat buvttadeaddji ahte lea miellagiddevaš sudno ovttastahttit.
– Soai leaba áŋkorastojuvvon goabbá ge musihkkamállii, muhto seammás leaba goappašagat hui sáhkkii ja háliideaba seaguhit iežaska musihkaid eará málliiguin. Šaddá gelddolaš go guorahallagoahtiba nubbi nuppi musihka ja ráhkadeaba oktasaš šuoŋa. Skápmajienain han lea árbevierru ahte artisttat ráhkadit ovtta dahje guokte oktasaš šuoŋa, lohká Stapnes.
Sieludálkkas
Skápmajienat geasuhit juohke jagi olu olbmuid, ja eanaš konseartabáikkiin jođihit buot bileahtaid.
Buvttadeaddji lohpida gehččiide erenomáš eahkeda.
– Skápmajienat konsearta šaddá erenomáš, ja mun jáhkkán ahte guldaleddjiin lea ráfi sielus maŋŋel konsearta. Jáhkkán sii vásihit konseartta skápma sieludálkkasin, loahpaha Hans Stapnes.
