Orohat 16 Kárášjoga Oarjjabeali advokáhtta ii loga orohaga boastut maidege bargan áššis.
Orohat 16 Kárášjoga oarjjabeali čuoččuhus áššis lea ahte mearrádus man sin jahkečoahkkin lea dahkan, dat lea siskkobealde lága.
Leage nu ahte Skáiddaduottar siida dahke mearrádusa siidastivrras, gos eanetlohku stivrras 2015:s mearridedje ahte siiddas galgá ovttamađe boazolohku leat juohke siidaoasis.
Ii unnideapmi
Orohat 16 Kárášjoga oarjjabeali advokáhtta, Gisle Loso, lohká ahte ášši lea hui álki su oainnu mielde.
– Siida lei unnidan boazologu mearriduvvon boazolohkui, mii lea 4100 bohcco. Go eallu lei unniduvvon 2015:s, de mearridii siidda stivra seamma jagi , go eallu lei siskkobeale mearriduvvon boazologu, ahte dál galget heivehit guđege siidaoasi boazologu vai galget šaddat ovttamađe bohccot guđesge. Nu guhká go ii leat šat unnideamis sáhka, dalle lea siiddas vejolašvuohta dakkár mearrádusa dahkat. Nu ášši lea čielggas min mielas, lohká Loso.
Amundsen gesii ovdan iežas ovdanbuktimis ahte Ottar Anti alimusriektemearrádusas daddjo ahte ii sáhte eanetloguin mearridit boazologu siiddas dahje orohagas. Ii go dat guoskka dán áššái maid?
– Guokte oasi dan duomus mat dahket ahte ii sáhte dainna áššiin váikkuhit dán ášši. Vuosttaš vuos ahte go Anti orohagas ii lean unnidanproseassa čađahuvvon, nu doppe lei unnidanproseassa man oktavuođas eanetloguin mearridedje guhtiige boazologu. Dán áššis ii leat unnidanproseassa, muhto reguleren maŋŋel go leat juo unnidan. Nubbi vel ahte go Anti orohagas ledje boazologuid guđege siidaoassái mearridan iešguđetládje, ja dan ii gal sáhte. Dán áššis lea mearriduvvon ovttamađe bohccot guhtiige Skáiddaduoddaris, ja danin lea doallevaš mearrádus, lohká Loso.
Unnidit
Loso lohká ahte sin oainnu mielde lea nu ahte go siiddastivra lea mearridan ovttamađe boazologu, de galget sii álggos unnidit, jus orohagas lea badjel dan mearriduvvon logu, badjel 4100 bohcco, mii lea mearriduvvon siiddas galgá leat.
Dasto go sii leat unnidan geat leat badjel dan mearriduvvon logu mii guđesge galgá leat, ja siiddas de olihuvvo 4100 bohcco, de ii dárbbaš šat unnidit.
Juohke háve go siiddas lea badjel 4100 bohcco, de fertejit sii unnidit geain lea beare olu bohccot dan mearriduvvon logu ektui mii siidaoasis galgá lea mearrádusa dáfus. Mearrádus ii leat ahte buohkat galget unnidit mearriduvvon boazolohkui mii leat guhtiige mearriduvvon, muhto jus lassána boazolohku, de lea daid ovddasvástádus ovddemus unnidit geain leat eanet bohccot go dan boazologu mii guhtiige lea mearriduvvon.
– Nie lea ášši beare. Nu ahte Orohat 16 Kárášjoga oarjjabealli, geaid mun ovddastan, sii leat rievtti alde dán áššis, lohká Loso.
