Sámiráđđi lea mearridan juohkit dán jagi girjjálašvuođabálkkašumi Siri Broch Johansenii nuoraidromána «Mun lean čuoigi» ovddas.
Sámiráđđi lea mearridan juohkit dán jagi girjjálašvuođabálkkašumi Siri Broch Johansenii nuoraidromána «Mun lean čuoigi» ovddas.
Sámi girječálli Siri Broch Johansen oažžu bálkkašumi nuoraidromána «Mun lean čuoigi» ovddas, dieđiha Sámiráđđi preassadieđáhusas.
Duostilis girječálli
Árvvoštallanlávdegoddi cealká earret eará ahte Siri Broch Johansen govvida bures mo sámi nuorat bajásšaddet ovttain julggiin sámi kultuvrras ja nuppiin julggiin ges ođđaáigásaš máilmmis.
– Girječálli duostá čállit tabuaáššiid birra, dego seksa ja jápmima birra. Girji guoskkaha dovdduid dego ráhkisvuođa, balu, heahpaneami ja morraša rabas ládje bártni perspektiivvas, cealká lávdegoddi.
Olaha lohkkiide
Jagi 2014:s almmuhii Čálliidlágádus «Mun lean čuoigi» girjji. Árvvoštallanlávdegoddi dadjá girjjis njuovžilis ja gehpes giela mii heive bures nuorra lohkiide.
– Muitalusas lea olu man beallešaddit soitet dovdat dahje ieža vásihit. Dat geasuha lohkki ja fille su beroštit muitalusa nuoraid birra. Muitalus čuohcá dovdduide, joksá lohkki váimmu ja báhcá guhka muitui, čállá árvvoštallanlávdegoddi.
Siri Broch Johansenii geigejuvvo bálkkašupmi Gironis golggotmánu 22. beaivvi.
