-Almmuhus-
OĐĐASAT Sirdet dievasčoahkkima deike

Sirdet dievasčoahkkima deike

-

-

Sámediggi doallá čakčamánu dievasčoahkkima Stuorradikkis Oslos.

Stuorradiggi ja Sámediggi dieđihit ilolaččat ahte Sámedikki dievasčoahkkin čakčamánus dán jagi lágiduvvo Stuorradikkis. Čoahkkimat lea vuossárggas čakčamánu 21. beaivvis bearjadahkii čakčamánu 25. beaivái.

Dievasčoahkkin lea Láhkadiggesálas. Dasa lassin lágiduvvojit maiddái fágalávdegottiid čoahkkimat Stuorradikkis, čállá Sámediggi preassadieđáhusastis.

 

Čalmmustahttit sámi áššiid

 – Lea stuorra gudni Sámediggái go beassá lágidit dievasčoahkkima Stuorradikkis. Mii doaivut ahte dát lea mielde čalmmustahttimin sámi áššiid Norgga riikkamediaide, ja ahte sámi áššiid máhttu ja áddejupmi lassána sihke Stuorradikki politihkkáriid gaskka ja riikka oaivegávpoga álbmogis, dadjá dievasčoahkkinjođiheaddji Jørn Are Gaski.

 – Mii doaivut ahte ollu guldaleaddjit, sihke sámit ja earát, bohtet Stuorradiggái lávdegoddečoahkkimiidda ja dievasčoahkkimii, dadjá Gaski.

 

Guokte dehálaš ávvudeami

 – 2014:s ávvudeimmet mii sihke Vuođđolága 200-jagibeaivvi ja Sámedikki 25-jagi ávvudeami. Guokte dehálaš ávvudeami norgga álbmotstivrejupmái ja demokratiijai. Mun ledjen ieš dan fiinna Sámedikki ávvudeamis mii lei Kárášjogas golggotmanus diibmá. Dát lea duogáš dasa go Stuorradiggi lea bovden Sámedikki doallat ovtta daid njealji jahkásaš dievasčoahkkimiin stuorradiggevisttis, dadjá stuorradiggepresideanta Olemic Thommesen.

 – Mii leat movttegat go beassat leat doallogoddin Sámedikki áirasiidda ja leat ge addán dan gutnálaš láhkadiggesála geavaheapmái dán dilálašvuhtii, lasiha son.

 

- Advertisement -
-Almmuhus-