Ráđđehus lea mearridan ahte Oahpahusdirektoráhtta galgá sirdit bargosajiid Romsii ja Hamarii.
Oahpahusdirektoráhtta galgá sirdit bargosajiid Oslos Romssa gávpogii ja Hamarii.
Čieža bargosaji galget Romsii ja 13 bargosaji Hamarii, ja dat galgá dahkkot juo boahtte jagi. Ráđđehus ákkasta sirdima ahte sii háliidit nannet fágabirrasiid ja oažžut eanet bargosajiid Romsii ja Hamarii.
Nannejit gealbobirrasiid
– Mii sirdit dál 20 stáhtalaš bargosaji Oslos Romsii ja Hamarii vai sáhttit nannet ja čohkket gealbobirrasiid. Romsii čohkkejuvvo digitála bálvalusaid ja karriearabagadusa ovddasvástádus, juoga mii lea hui dehálaš, ja Hamaris nannejuvvo pedagogalaš doarjaga ja bagadusa fágabiras, lohká máhtto- ja integrerenministtar Jan Tore Sanner (Olgeš) NTB:i.
Sirdet 800 bargosaji
Ráđđehus lea ovdal mearridan sirdit sullii 800 bargosaji Oslos eará báikkiide.
Oahpahusdirektoráhtta lea Máhttodepartemeantta vuollásaš ja hálddaša earret eará mánáidgárddiid rámmaplána ja vuođđooahpahusa oahppoplánaid, oahpahus- ja mánáidgárdelága, ja galgá ovddidit mánáidgárddiid, vuođđoskuvlla ja joatkkaoahpahusa.
(©NTB)
