Vuossargga diibmu 00.01 válddii Babcock Scandinavian AirAmbulance badjelasas ambulánsagirdistašuvnnaid doaimmaid. Beaivválašjođiheaddji Marius Hansen lea duhtavaš go sirdašupmi lea manna njuovžilit.
– Mii leat rámiin ja vuollegašvuođain váldán badjelasas doaimmahit máilmmi buoremus ambulánsagirdibálvalusa maid mii maiddái áigut viidáseappot ovdánahttit, dadjá Hansen.
Hansen lea movttet go oažžu 91 eallilan ambulánsapilohtaid mielde, liikká das bohtet hástalusat hárjehaddamis ođđa girdiiguin.
Vuosttaš ámbulansagirdi Babcock operatevran girdilii Romssas 17 minuvtta badjel gaskaija.
Lei Beech B250 nammasaš mii girddii Levdnjii.
Ođđa ambulánsajeta girddii vuosttaš háve vuossarga ovdalgaskabeaivvi.
Hansen lea duhtavaš boahtit johtui bálvalusain.
– Mis lea dál dievas fokus sihkkarastimis gearggusvuođa seammas go mii leat molsunáigodagas geahččaleamin buot pilohtaid ráhkkanahttit, loahpaha Hansen.
