Frank Ailo Tangen sirdá Álttá if spábbačiekčanjoavkus Troandimii Nardo jovkui.
Frank Ailo Tangen sirdá Álttá if spábbačiekčanjoavkus Troandimii Nardo jovkui.
Kárášjohkalaš Frank Ailo Tangen galgá čiekčagoahtit Troandima joavkku Nardo ovddas, mii lea Post-Nord divišuvnnas nuppi ossodagas, ja lea gearggus čiekčat sotnabeaivvi čiekčama Vidar joavkku vuostá.
Stuora taleantta
Nardo joavku čállá iežas neahttasiiddus ahte Tangen lea 18-jahkásaš Kárašjohkalaš, ja sus lea sámi duogáš ja sámegiella lea maid su eatnigiella.
– Son fárrii Kárášjogas, gos čievččai Ravdojok BK ja Nordlys VJ, Áltái jagi 2015. Doppe bážii moala su vuosttaš čiekčamis 16-jahkásažžan. Seamma jagi válljii Nordlys áviisa su leahkit okta dain 10 stuorámus taleantan Davvi-Norggas. Son čiekčá njunuščiekčin ja falleheaddjin, čállet sii.
Álki válljet Nardo
Tangen fárre dál Troandimii joatkit studerema valáštallansuorggis. Gažaldahkii manne válljii Nardo jovkui álgit vástida Tangen ahte háliida eanet čiekčat ja ahte áigu geahččalit juoga ođđa, go háliida vuoruhit spábbačiekčama.
– Lei lunddolaš munnje fárret Troandimii go mus lea bearaš dáppe ja go dáhtton fárret. Šattai álkin válljet Nardo go ledjen ožžon máhcahemiid ahte lea buorre joavku gos lea buorre biras, buorit čiekčit ja hárjeheaddjit, lohká son.
Tangen lohká bures vuostáiváldon joavkkus ja dássi orro heiveme sutnje hui bures.
– Diehtá gos moalla lea
Nardo Hárjeheaddji Tormod Bjerkeset bagadallá Tangena ahte áŋgiris ja mearrediđolaš čiekči.
– Sus lea buorre vuođđomáhttu, lea jođán ovddasguvlui. Son lea hárjehallan minguin maŋemus áiggiid, ja čájehan ahte diehtá gos moalla lea.