– Dološ árbevirolaš luohti muitala ahte nu guhká go mis sámiin ain leat eatnamat, de mii galgat juoigat, dadjá Simon Issát Marainen. Dál almmuha son ođđa skearru «Siiddan», Nutti Sámi Siidda luhtte Čohkkirasas.
– Luohteárbevierut leat hearkkes diliin nugo maid min eatnamat. Danin lea ereliiggán dehálaš ahte min mánát ja nuorat gullet ja ohppet dološ ja ođđa luđiid. Mun doaivvun eatnamiid maiddái sáhttá suddjet luđiid bakte go dat vuosehit min nanu gullevašvuođa árbeeatnamiidda, lohká Marainen preassadieđu bokte.
Bealli árbevirolaččat
Siiddan skearrus leat 14 bihtá mas bealli dain juigojuvvo árbevirolaččat ja loahppa ovttas iežá musihkain.
Siiddan lea Axel Olle Sigurd Andersson Utsi buvttadan ja báddema leat dahkkojuvvon Tajgan studios Áhkkavárie gilážis Árvvesjávrri nuortalis. Axel Olle Sigurd Andersson Utsi lea guhká ovttasbargan Simon Issáhiin.
– Simon Issát lea okta dain dovdoseamos árbevirolaš juigiin dálá Sámis. Son čuovvu doložiid go doalaha don dološ sámi juoiganárbevieru ođđa áiggis. Ja jietnadáiddárin son lea maid hui čeahppi go váldá vuhtii ja duostá geahččaladdat luođi ovttas ođđaáigásaš musihkain. Mun dieđán ahte Simon Issáha luđiid bohtet boahttevaš buolvvat ain juoigat, lohká buvttadeaddji Andersson Utsi.
Skearru lea ožžon nama Siiddan danin go Marainen juoigga lagas olbmuid ja bohcco eallima.
– Munnje lea sielu dálkkas luđiiguin bargat ja lea mu mielas vuogas vuohki vuosehit ráhkisvuođa, lohká Marainen.
Lávvordat lea almmuhankonsearta Čohkkirasas. – Boađe fal Čohkkirassii juoigat minguin, mis leat ain eatnamat ja nu maiddái luohti, loahpaha Marainen.
