-Almmuhus-
-Almmuhus-
-Almmuhus-
OĐĐASATŠilta vuot billistuvvon

Šilta vuot billistuvvon

-

-

Sálašoaivvi šilta mii lea čállojuvvon sámegillii ii beasa orrut ráfis, oanehis bottus lea šilta nuppes billistuvvon.

Eai leat guokte mánu ge vássán dan rájes go Sálašoaivvi šilta billistuvvui Romssa suohkanis. Dalle lei muhtin sáhcon šiltta badjel mii čájeha guđe guovllus bálggis Sálašoaivái manná, dál galgá muhtin málen šilta.

 – Lea suddu go olbmot eai árvvusane šilttaid, dadjá Romssa várrevárresátnejođiheaddji Anni Skogman, gii ovddasta Ovddádusbellodaga. Dán čállá Nordlys aviisa.

Ii dáhto šiltasoađi

Romssa sátnejođiheaddji, Jens Johan Hjort, ii leat kommenteren šiltabillisteami. Muhto son lea áŋgiruššan šiltaáššiin Romssa suohkanis dan rájes go čohkkedii sátnejođiheaddjistullui masá njeallje jagi áigi. Son háliidivčče Romssa báikenammašiltta sámegillii, muhto ii son jáhke áiggi vel láddan galbet sámegillii. Son lea jávohaga galbegoahtán valáštallanvisttiid ja eará almmolašvisttiid sámegillii, ja son diŋgui persovnnalaččat ođđa Sálašoaivvi šiltta go dat billistuvvui ovdal beassážiid. Dalle celkkii ahte šiltabillisteapmi ii leat dohkálaš.

– Lea dárbbašmeahttun ja mánnálaš billistit sámegiel šiltta, muhto seammás lea dát hui duođalaš. Mun in dáhtošii šiltasoađi iežamet gávpogis, logai Hjort.

-Almmuhus-