Sis-Finnmárkku diggegoddi lea cealkán duomu áššis, mas muhtin boazosápmelaš lei ášši vuolggahan eanandoallo- ja biepmodepartemeantta vuostá, go oaivvilda ahte leat lobiheamet heaittihan su siidaoasi.
Sis-Finnmárkku diggegoddi oaivvilda mearrádus lea lobálaš ja almmái lea maiddái dubmejuvvon máksit áššegoluid stáhtii, 97 650 ruvnno.
Vuollil 50 heakka
Čuolbma áššis lea go boazolohku albmás galgá leat leamašan vuollil 50 heakka vihtta jagi. Duogáš mearrádusas lea ahte boazodoallodieđáhusas jagi 2015/2016 ledje albmás 25 bohcco.
Albmás ii leat leamašan siidaoassi ovdal jagi 2013:s, dalle dahkkui šiehtadus go válddii badjelasas siidaoasi, dan ovdal galgá sus leat leamašan bohccot eará siidaoasi vuolde.
Sus eai galgga leat leamaš dan áigodagas badjel 50 heakka.
Ii váttis háhkat alcces bohccuid
Diggi čállá duomus ahte sii eai oainne ahte ođđa siidaoasseeaiggát dárbbaša vihtta ođđa jagi cegget ealu.
– Jus háliida ásahit iežas siidaoasi, de lea oalle álki háhkat alcces 50 bohcco, vaikko lea váldán badjelasas siidaoasi mas eai leat bohccot. Okta vuohki lea váldit olbmuid mielde siidaoassái geain leat bohccot, dahje ieš cegget ealu, čállá diggi duomus.
