-Almmuhus-
OĐĐASATSiida bivdá skohtermáđiid sirdit

Siida bivdá skohtermáđiid sirdit

-

-

Jeagilvári siida lea dáhtton Kárášjoga gieldda geahčadit lea go vejolaš sirdit guokte máđija eret sin dálveorohagas.

Skohtermáđijat nummar 5 ja 17 leamašan gaskaboddosaš giddejuvvon maŋemuš áigge go Jeagilvári siidda eallu lea guovllus.

Jeagilvári siidda olmmoš Nils Aslak Guttorm lea sádden guhkebuš reivve Kárášjoga gildii mas čilge hástalusa go almmolaš skohtermáđidja lea biddjon sin dálveeatnamii, ja siida bivdá gieldda geahččat vejolašvuođa sirdit skohtermáđija.

Guttorm čállá sis lea evttohus geinnodahkii, muhto daid ii hálit almmuhit ovdal go lea gulahallan eará siiddaiguin.

 

Ballet mastadit ja šaddat biebmagoahtit

Jeagilvári siida čállá ahte váikkuhus jus luottat dál rahppojit lea ahte sii sáhttet mastadit eará siiddaiguin, ii ge guohtondilli buorrán, muhto bohccot huššaluvvojit ja soitet vel šaddat biebmagoahtit ealu.

Gaskaboddosaš giddengáibádus lea leamašan dárbbašlaš máŋga jagi, muhto álbmoga vuostehágu dihtii de lea siida geahččalan garvit giddema.

Sii čállet ahte dán jagi lea siida váldán vuhtii bohccuid iige álbmoga beroštumiid ja hástalusaid.

 

Bivdet doallat gitta máđijaid

Jeagilvári siida ii loga iežaset háliidit leat hehttehussan almmolaš skohtermáđijaide, muhto seammás fertejit áimmuhuššat ealu, ja bivdet Kárášjoga gieldda ain doallat skohterlmáđijaid gitta seammás go bivdet gieldda geahččat vejolašvuođa sirdit skohtermáđijaid dán guovtti luottas (nr 5 ja nr 17). Skohterláhttut leamašan gitta measta gávccivahkku.

Kárášjoga gielda ii oidno vástidan siidda, muhto lea áššemeannudeapmái bidjan ášši.

-Almmuhus-