-Almmuhus-
OĐĐASAT– Sii vigget "háddjet ja ráđđet"

– Sii vigget “háddjet ja ráđđet”

-

-

Son lohká eiseválddiid duvdime ovddasvástádusa ealáhusa nala, go ieža eai šat nagot vuolidit boazologu.

Mánnodaga ja distaga lei Álttás seminára man Eanandoallodirektoráhtta lágidii čoaggindihte boazodolliin jurdagiid movt hábmet boazodollui iešstivrejumi ja siskkáldas kontrolla. Dat prošeakta galgá šaddat oassin 2017 Boazodoallolága bargui ja lea aitto álggahuvvon.

Ii šat áhččin ii ge eadnin

 – Dál ii galgga šat boazodoalus áhčči ja eadni mat stivrejit, dajai Eanandoallodirektoráhta fágadirektora Ola-Christian Rygh gii jođihii sáhkavuoruid.


ČOKKII BOAZODOLLIID OAINNU: Eanandoallodirektoráhta fágadirektora Ola-Christian Rygh jođihii sáhkavuoruid. Govva: Marit Elin Kemi

 

– Eret oaivebákčasa

Guovdageainnu johttisápmelaččaid searvvi jođiheaddji gal vuohttá baicca ahte eiseválddit eai nagot šat ieža stivret boazodoalu.

 

 – Vuhtten čađat ahte eiseválddit áiggoše stivrejumi duvdit boazodollui, vai ii leat šat sin oaivebávččasin. Árvideames leat beassan stivret dassážii go leat dolkan ja leat bártahuvvan go eai nagot stivret nugo livčče háliidan. Dasa dat orui dát čielggadeapmi, moaitá Sara.

 

– Ieža šaddet diggot

Son ballá dál leat njuolgut geahččaleame háddjet boazodolliid.  

 – Mun árvidan ahte ballet ii várra oba boađe ge sadjái dat boazolohku. Sii háliidit danne mii galggašeimmet boazologuiguin ieža moivet ja šaddat dikkiide ja vuostálaga. Dárogillii lea dajaldat “háddjet ja ráđđet”.

Nils Mathis M. Sara

Sara lohká vuohttit dál eai gulahala direktoráhtain eai ge fylkkamánniin.

 – Vuohtán ahte duvdet ovddasvástádusa boazodoalu ala ja de oainnát ii leat šat ávki min moaitit maŋŋel go ieža leat váldán stivrejumi. Galggašeimmet goit ovdal go min ala gahččá ovddasvástádus, čielggadit ovddasvástádus beali, ahte leago nu ahte jus šaddat vuostálaga ja duhtameahttumat, de galgat ieža diggot boazologu nalde, ja ieža mearridit nuppiid badjel.

 

Orohat 16 ovdamearkan

Eanandoallodirektoráhtta lei dán seminárii bovden orohat 16, mii lea stuora orohat Kárášjogas, muitalit movt sii leat bargan ja mov sii leat ožžon dan maid eiseválddit gohčodit iešmearrideapmin ja siskkáldas kontrollan.

 

Orohat 16 ovdaolmmoš Klemet Amund Eira lei čilgeme mikrofovnnas movt sii leat bargan.


– Midjiide geat leat viggan stivret, gal lea iešstivrejupmi oahpes sátni, go ođđa láhka addá vejolašvuođa ieža stivret omd boazologu, guohtunrájiid, makkár áiggiid johttát, áiddiid ja dat mat gullet beaivválaš boazobargui. Dál sáhttit ieža doaibmanjuolggadusaid bokte hábmet dieid. Dan leat eiseválddit hoigame min ala, dadjá Eira.

 

Navdá riidduid lassánit

Nils Mathis M. Sara gal eahpida ahte dákkár stuora orohat lea buorre. Son ballá ahte nu leat seammás hoigadeame ovddasvástádusa ja barggu, ja ahte šaddet siskkáldasat eanet váidagat ja nákkut.

 – Juohke sajis gos bijat rájiid ja meriid, dieđusge álggos sáhttet šaddat riiddut. Muhto galgat ge gávdnat vuogádaga gos sáhttá čoavdit áššiid ovdal go šaddet riidun. In sáhte lohkat gal mis leamaš riiddut gal eananjuogu nalde, go mii leat geahččalan hui vuđolaččat bargat go bijaimet lávdegotti bargat, ja stivra ja álbmot de barge ovddosguvlui.

 

Orohat 16 stivramiellahttu Leif Anders Somby lohká sihke buriid ja heajos beliid stuora orohagas.

 – Lea buorre jus luitet ovddasvástádusa hábmet ealáhusa nu bures go ealáhus máhttá ja sáhttá, muhto árvideames gávdno sivva manne hoigadit dan ovddasvástádusa ealáhussii. Sáhttá leat danne go lea váttis oažžut čađa stuora áššiid mat leat váddásat boazodollui, dadjá Somby.

 

Somby lohká oahpes áššin ahte stáda viggá háddjet ja ráđđet, go nu lohká eará ealáhusain.

 – Dákkár áššit buktet gal vehá rieja ja váttisvuođaid, muhto fertet dan maid oaidnit ahte buohkat galget birget doppe, ja ferte ieža gulahallat movt birget. Sáhttá šaddat buoret go beassat ieža hábmet.

 

Moite hálddašeddjiid

Joavkobargguin bođii ovdan ahte boazodoallit leat duhtameahttumat hálddašeddjiiguin. Sii moitet lea heajos gulahallan direktoráhta ja fylkkamánniid gaskka ja maid heajos gulahallan dáid etáhtaid ja boazodoalu gaskka.

 

 

 

 

-Almmuhus-