Son dáhttu fuomášumi bidjat almmolaš givssideapmái sosiála median, maid oaivvilda politihkkáriid vásihit Kárášjogas.
Son dáhttu fuomášumi bidjat almmolaš givssideapmái sosiála median, maid oaivvilda politihkkáriid vásihit Kárášjogas.
*/
Kárášjoga Guovddášbellodaga politihkar Hege Joks lea guhkit áiggi vásihan ahte dihto politihkkarat systemáhtalaččat givssiduvvojit ja cielahuvvojit sosiála mediain, ja sii eai nagot bissehit dan.
Joks lohká mobben lea máŋgasa vuostá ovtta bellodagas, ja sii skudnejuvvot ja gutnehuhttojuvvot vuoruid mielde.
– Mu mielas ii leat dat šat sátnefriddjavuohta, ja lea suorggahahtti go olbmot geat barget eaktodáhtolaččat gieldda ássiid ja álbmoga ovddas šaddet vásihit mobbema.
Fuomášumi bidjat
Joks dáhttuge fuomášumi bidjat áššái go lea áibbas dohkketmeahttun, ja politihkkarat eai oro ieža nákceme bissehit bilkideami.
– Givssideapmi dáhpáhuvvo sosiála mediain, ja lea leavvan eará arenaide maid.
Son oaivvilda sii geat čállet dákkár gutnehis čállosiid «facebook» sosiála medias, gehččojuvvot dego juogalágan sáŋgárin go earát deaddilit «liker» boalu:
– In oaivvil sii maiddái leat givssideamen, muhto go liikojit čállosiid, de dat nanne ahte orro dohkálaš ná olbmuid ogohallat ja givssidit.
Ollesolbmot ovdagovvan
Joks mielas ii atte dat buriid signálaid min mánáide ja nuoraide, ja danne háliidage ollesolbmuid bisánastet ja jurdilit.
– Mii ollesolbmot leat ovdagovvan, ja jus mii givssidat ja mánáid gieldit givssideames earáid, de šaddá duppalmorála. Ollesolbmot galggašii dan atnet muittus ja galggašii jávohisvuođas lihkkat ja čájehit vuostehágu dákkár givssideapmái. Áinnas galggašii eará politihkkarat reageret, go dat ii leat dohkálaš, lohká son.
Servvodatváttisvuohta
Joks ii áiggo namuhit gii dahje geat givssidit, muhto lohká smávva servvodagas dihtet olbmot geat leat duogábealde. Danne áigu son almmolaččat čuožžilit givssideami vuostá.
– Lean ieš politihkar, servvodatássi, fágaolmmoš ja eadni. Danne lea dehálaš čájehit min nuoraide ja ássiide ahte eat hálit dákkár servvodaga gos mobben lea dohkálaš. Mobben han lea stuora servvodatváttisvuohta ja dutkan čájeha ahte sii geat givssiduvvojit sáhttet oažžut psykalaš váttisvuođaid ja sin eallin sáhttá billohuvvot, dadjá Joks.
Dušše cuiggoda
Jarle Boine lea okta dain guhte lea hui viššal cuiggodit politihkkáriid sosiála mediaid bokte, sus lea alddis debáhttasiidui gos áŋgirit čállá erenoamážit Guovddášbellodaga politihkkáriid birra.
Maŋimuš beivviid lea sirdán digaštallama maiddái vuovdin-siidduide Facebookas, nu mo Karasjok Tavla-siidui.
Boine ieš ii oaivvil dan givssideapmin, go son dušše cuiggoda maid politihkkarat leat maŋemus áigodagas bargan:
– Sii váldet alcceseaset oaffarrolla go lohket dan givssideapmin, ja mu oainnu mielde leat sii čohkkeme sympatiija jienaid ovddabealde válggaid, oaivvilda Boine.
*/
Mobbejit baicca su
Boine oaidná baicca su leat givssideamin go vigget jaskkodahttit su:
– Mun lean dušše eaŋkilolmmoš, ja gielddastivrras leat 19 mu vuostá. Munnje leat maid áitagat boahtán sosiála mediaid bokte go lean kritihkalaš politihkkariidda, nu ahte mun oainnán ášši nuppe láhkai. Politihkkarat galggaše geahčestit maŋos ja jearrat gii givssida gean. Mu vuostái leat maid viggan geavahit mu áššiid mu vássán áiggis, vai galggašin heaitit čállimis sosiála mediain, lohká son.
