-Almmuhus-
OĐĐASATSihtet fas ohcat ja čoaggit guovžabaikkaid

Sihtet fas ohcat ja čoaggit guovžabaikkaid

-

-

Jus orut navdime guovžža leat lagas birrasis, de ávžžuha Stáda Luonddubearráigeahčču (SNO) ohcat guovžžabaikka, ja sáddet baikkaid sidjiide vai besset iskat daid.

Rovdata viežžá DNA-iskosiid mat leat sáddejuvvon vai sáhttet kártet Norgga guovžanáli. Juohke jagi čogget guovžabaikkaid miehtá riikka, ja leat ollugat geat servet dan doibmii.

Ovdamunni lea ahte sáhttá gozihit guovžanáli, ii ge dárbbat mannat nu beare lahka daid guovžžaid.

 

Ávžžuhit čoaggit baikkaid

– Mii ávžžuhit vázzi mátkkálaččaid, bivdiid, murjejeddjiid ja eará luonddugeavaheddjiid geahččat gávdnojit go guovžžabaikkat. Baikaosiid sáhttá doalvut SNO:i mii lea lagamus báikkis. Jus leat ollu guovžžat ovtta guovllus, de ii galgga leat váttis čoaggit guovžabaikkaid, čilge Rovdata jođiheaddji Jonas Kindberg.

– Guovžabaikkas, mii lea unni dego suorbmageahči, sáhttet leat ollu dieđut guovžža birra ja dan eallima birra. Das sáhttet oaidnit lea go duođas guovžžabaika, makkár sohkabealli dat lea, lea go dat guovža ovdal dieđihuvvon ja dan ássanguovllut. Go máŋggaid jagiid leat čoaggán guovžabaikkaid ja kárten daid, de sáhttit oaidnit Norgga ja Ruoŧa guovžanáli, go doppe geavahit seamma vugiid go dáppe, lohká son.

 

Sevdnjes baika

Ii leat álo nu álki earuhit guovžžabaikka eará baikkaid ektui. Čakčageasi lea guovžžas sevdnjes baika ja das leat bázahusat mat eai leat suolbmuduvvon doarvái čoavjjis.

De oainnát muorjebázahusaid, šattuid ja gotkkaid baikkas.

 

Sihtet geavahit plastihkkabusse

– Go galggat čoaggit baikkaid, de lea hui dehálaš ahte geavahat ráinnas plastihkkabusseža. Jorggo busse baikka badjel, ja várut ahte ieš it guoskka dan baikii, go de billahuvvá dat iskkus. De merkestat iskosa iežat namain ja čujuhusain, čálistat gos dan gávdnet ja dáhtona, ja áinnas bidjal vel kártadieđu fárrui. Bija baikka galmmiheapmái dassážii go sáhtát doalvut dan SNO:i, lohká Kindberg.

Guolgaiskosa bidjalat konvoluhttii go ollet ruoktot, it ge dárbbat dan galmmihit. Das lea guovžža DNA guolgaruohttasiin. 

Dieđut juohke baikkas ja guolggas mii dárkkistuvvo, biddjo Rovbasii maid gávnnat neahtas.

 

Dá oainnát filmmaža mas čájeha movt čoakkát baikka:

-Almmuhus-