Luossagárgideami oktavuođas bivdá Guolástusdirektoráhtta olbmuid cavgilit jus oidnet dahje goddet luosaid mat leat gárgidan luossagárddis.
Heajos dálki lea dagahan hástalusaid viđa ámmátlaš fatnasii mat leat čorgemin biebmoluosaid mearas eret. Gohččun lei čorget vihtta kilomehtera rádius siskkobealde. Guolástusdirektoráhtta bivdá dál olbmuid cavgilit jus oidnet dahje goddet biebmoluosaid. Sii ávžžuhit maid govvet luosa.
Juovlamánu loahpas juo gárgidan
Mowi Norway dieđihii guollegárgideami birra Guolástusdirektoráhttii juovlamánu loahpas. Gárgideapmi lei Mefaldskjæret guollerusttegis mii lea Alstadhaug gielddas, Nordlánddas. Sii dieđihedje dalle ahte luossagárddis lea vuođđu ráigánan. Logut čájehit oktiibuot 2540 luosa leat gárgidan. Dán rádjái leat 581 gárgidanluosa fidnen gitta, muhto dál čájehuvvo ahte gárgidan luosaid logut sáhttet lassánit. Guolástusdirektoráhta Nordlándda ossodaga seniorráđđeaddi Øyvind Olsen muitala Ávvirii čájehuvvon njealji gárddis leat ráiggit, iige dušše ovttas, nu go álggos jáhkke.
Cavgil dan FMC:i, mii lea Guolástusdirektoráhta faktaguovddáš. Dat lea birrajándora rabas. Nummar lea 911 03 277.
