-Almmuhus-
OĐĐASATSihtet bissehit biedjo­bivddu

Sihtet bissehit biedjo­bivddu

Journalista

-

-

Stáhta Luonddubearráigeahčču lea dán jagi báhčán gávcci geatkebiejus čivggaid, ja dál gohčču Luonddugáhttenlihttu oalát bissehit dakkár bivddu.

Maŋemus 20 jagis leat 184 geatkečivgga jávkaduvvon dainna vugiin, cealká Luonddugáhttenlihttu preassadieđáhusas.

– Geatki hálddašuvvo árvvohemiid Norggas. Stáhta bivdit mannet biejuide ja báhčet njiŋŋelas getkkiid ja aiddo šaddan čivggaid. Dat ii leat ehtalaš dahku, ja mii háliidit ahte geatki hálddašuvvo dohkálaččat, dadjá Luonddugáhttenlihtu fágaráđđeaddi ja biologa Arnodd Håpnes.

Bivdu čađahuvvo guovvamánus miessemánu rádjái, ja 2004 rájes leat badjel 300 geatkečivgga báhččon. Lassin čađahuvvo vel liseansabivdu borgemánus guovvamánnui. Luonddugáhttenlihttu deattuha ahte lea geatkebivdu measta birra jagi, vaikko geatki lea rukses listtus Norggas ja lea ráfáiduhtton ealli.

Luonddugáhttenlihttu dieđiha ahte geatkkis lea dehálaš doaibma luonddus go lea oassi luonddu ekologalaš ovttasdoaibmamis, ja lea dárbu eanet boraspiriide ja eanet lundui Norggas.

Stuoradikki mihttu lea ahte galget 39 geatkečivgajoavkku Norggas jahkásaččat.  Dán jagi leat duođaštan 35 čivgajoavkku. Maŋŋel go leat báhčán  gávcci čivgajoavkku, de leat báhcán dušše 27 čivgajoavkku, dieđiha Luonddugáhttenlihttu preassadieđáhusas.

-Almmuhus-