-Almmuhus-
-Almmuhus-
OĐĐASATSihtá Coop Extra Kárášjohkii

Sihtá Coop Extra Kárášjohkii

-

-

Su dieđuid mielde lea mearriduvvon ahte  Coop-buvda Kárášjogas galgá ođasmahttot, muhto Coop Finnmárkku direktevra šiitá dan.

Kárášjohkalaš Ragnhild Varsi Dahl lea áŋgiruššan ásahit ođđa Coop-buvdda ruovttubáikái. Dál lea Kárášjogas Coop Prix, muhto son háliidivčče dohko Coop Extra:

– Mun oainnán ahte lea dárbu ođasmahttit dálá Coop-buvdda dan dihte vai mis Kárášjogas lea buoret gálvoválljenmunni, buvdda visti lea boaris ja maiddái bargiid dihte vai sidjiide šaddá buoret bargobiras, dadjá Ragnhild Varsi Dahl.

Menddo bahkka geasset

Son muitala ahte ieš láve olu gávppašit Leavnnja Coop Extras ja vávjá man olu buoret gálvoválljenmunni dan buvddas lea Coop Prix ektui. Son maid muitala fearána birra go ieš lea leamaš geasset gávppašeame Coop-buvddas Kárášjogas. Doppe lei nu bahkka ahte šukkoláda lei šolgan.

Sus lea maid nieida bargan Coop Prix -buvddas ja danne diehtá mo doppe lea.

– Mu nieida lovttii barggus, muhto sutnje lávii váivi geasset bargat go šattai nu bahkka siste, čilge Ragnhild Varsi Dahl.

Giitevaš

Ragnhild Varsi Dahl jođiha Facebook-joavkku «Vi som krever Coop Extra til Karasjok», sámegillii «Mii geat sihtat Coop Extra Kárášjohkii». Joavkkus leat badjelaš 400 miellahtu, ja son lea giitevaš go nu oallugat beroštit buoridit Kárášjoga buvdda.

– Lea buorre go nu máŋggas leat searvan ja nu oallugat áŋgiruššet, dadjá Ragnhild Varsi Dahl.

Meannuduvvo giđđat

Dál lea Ragnhild Varsi ožžon dieđu «sihkkaris gálduin» ahte Kárášjogas rievdá Prix Extran ja ahte olles visti galgá ođasmahttot. 

Muhto, Coop Finnmárkku direktevrra dieđuid mielde ii leat mihkkege vuos mearriduvvon. Jan-Ivar Alsén, Coop Finnmárkku direktevra, ii loga leat duohtan dan maid Ragnhild Varsi Dahl oaivvilda. Son duođašta gal ahte galget meannudit ášši stivračoahkkimis boahtte jagi cuoŋománus.

– Ii leat duohta ahte Kárášjohkii lea vuos mearriduvvon ahte boahtá ođđa Coop. Finnmárkku Coop stivra galgá easkka cuoŋománus 2022 meannudit dan ášši, dadjá Alsén.

Ožžon dieđu sihkkaris gáldut

Ragnhild Varsi Dahl ii muital gii dahje geat su gáldot leat, muhto čuoččuha iežas juo gullan makkár Coopa  ođđa plánat leat.

– Mun ledjen hui ilus. Mun smihtten dat lei duođaid ávki ráhkadit Facebook-joavkku mas nu oallugat áŋgirušše. Ferten gulaskuddat fas mu gálduin mo dat manná dieinna áššiin, dadjá Ragnhild Varsi Dahl.

-Almmuhus-